اے شہنشاہِ سخن تجھ کو سلام
ہے بہت ہی دلنشیں تیرا کلام
لائقِ تحسین تیری شخصیت
قابلِ تقلید ہے تیرا پیام
9 نومبر ایک عظیم محقق و دانشور صوفی بزرگ و شاعر، مذہبی و روحانی رہنماء، بہترین علمی شخصیت، ہر دل عزیز جن کو شاعر مشرق کا درجہ دیا گیا حضرت علامہ اقبال کا یوم پیدائش ہے جسے یوم اُردو کے نام سے بھی جانا جاتا ہے۔ اردو ادب اور علامہ اقبال سے محبت رکھنے والے اس دن اپنی عقیدتوں کا اظہار کرتے ہیں۔
ایسی ہی عقیدتوں کے نذرانے پیش کرنے کے لیے گزشتہ روز گورنمنٹ ہائی سکول بدو ضلع جہلم کے زیر اہتمام سکول کے ہال میں پروقار تقریب کا انعقاد ہوا۔ تقریب کی صدارت ہیڈماسٹر حافظ محمد عثمان صاحب نے کی۔
اقبال دنیائے ادب کی قدآور شخصیت اور عظیم انسان کا نام ہے، اقبال ان شعرا میں سے ہیں کہ جنہوں نے شاعری برائے شاعری نہیں کی بلکہ ان کی شاعری میں فلسفہ حکمت کے مشکل و پیچیدہ اور خشک مسائل کو اشعار کا عملی جامہ پہنایا گیا ہے۔
تقریب میں نقابت کے فرائض محمدبرہان الحق نے ادا کیے، تلاوت قران مجید کی سعادت حافظ محمدعمر نے حاصل کی۔ بارگاہ رسالت مآب ﷺ میں منظور حسین چشتی نے ہدیہ عقیدت کے پھول نچھاور کیے۔ بعدازاں دعا (لب پہ آتی ہے دعا بن کے تمنا میری) پڑھی گئی اس کے بعد کلاس ہفتم محمد فیضان نے اقبال کو خراج عقیدت پیش کیا۔ کلاس دہم سے محمد دانیال نے کلام اقبال پڑھا ۔
بعدازاں محمد برہان الحق نے علامہ اقبال کا مشہور و معروف کلام (خودی کا سر نہاں لا الہ الا اللہ) کو کو ترنم کی صورت میں بڑی خوبصورتی کے ساتھ پیش کیا۔ ہیڈماسٹر سکول ہذا نے بطور عظیم مفکر کے حوالے سے سیر حاصل گفتگو کی۔ علامہ محمد اقبال کے فلسفہ ء اتحاد ملت علامہ اقبال کے پیغام کو مثالوں سے واضح کیا۔
آخر میں اس خوبصورت تقریب کا اختتام قومی ترانہ پر ہوا۔
