سوہاوہ: ڈومیلی کے علاقے جھنگ چک میں واقع روہتاس انٹرنیشنل سکول اینڈ کالج میں شجرکاری کے حوالے سے ایک پروقار تقریب کا انعقاد کیا گیا۔
تقریب کا آغاز تلاوتِ قرآن پاک اور نعتِ رسول مقبولؐ سے کیا گیا۔ تقریب کے مہمانِ خصوصی ڈائریکٹر جنرل محکمہ جنگلات پاکستان محمد ابراہیم خان تھے، جنہوں نے طلبہ و طالبات کے ہمراہ مختلف اقسام کے پودے لگائے اور شجرکاری کی اہمیت پر روشنی ڈالی۔
اس موقع پر محمد ابراہیم خان نے کہا کہ سرسبز پاکستان ہماری اجتماعی ذمہ داری ہے، اور ہر فرد کو شجرکاری مہم میں بھرپور حصہ ڈالنا چاہیے۔ انہوں نے زور دیا کہ درختوں کی بے دریغ کٹائی کے باعث بارشوں میں کمی واقع ہو رہی ہے، اور موسمی تبدیلیوں پر منفی اثرات مرتب ہو رہے ہیں۔ درخت لگانے سے نہ صرف ماحول بہتر ہوتا ہے بلکہ آلودگی بھی کم ہوتی ہے۔
روہتاس انٹرنیشنل سکول اینڈ کالج کے ڈائریکٹر نجیب ابرار گجر نے بھی تقریب سے خطاب کرتے ہوئے کہا کہ ادارہ پاکستان کو سرسبز و شاداب بنانے میں اپنا کردار ادا کر رہا ہے۔ طلبہ و طالبات کو شجرکاری کی اہمیت کے بارے میں آگاہ کیا جا رہا ہے تاکہ وہ مستقبل میں بھی درختوں کی حفاظت اور افزائش میں کردار ادا کریں۔
انہوں نے کہا کہ اگر ہر گاؤں کے افراد اپنے گھروں، جنازہ گاہوں، باغیچوں اور سڑکوں کے کناروں پر درخت لگائیں اور ان کی مناسب دیکھ بھال کریں تو ایک سال کے اندر نمایاں تبدیلی دیکھی جا سکتی ہے۔ تقریب کے اختتام پر شجرکاری مہم کو مزید فروغ دینے کے عزم کا اعادہ کیا گیا اور شرکاء نے سرسبز پاکستان کے لیے اپنی کوششیں جاری رکھنے کا عہد کیا۔
