جہلم شہر سمیت ضلع بھر میں برائلر مرغی کا گوشت مسلسل مہنگا فروخت کیا جا رہا ہے جبکہ وزن میں کمی اور من مانے نرخ شہریوں کے لیے وبالِ جان بن گئے ہیں۔
رواں ہفتے بھی مرغی کا گوشت 900 گرام کے حساب سے 800 روپے میں فروخت ہو رہا ہے، جس نے شہریوں کی پریشانیوں میں مزید اضافہ کر دیا ہے۔
گوشت فروش دکاندار من مانے نرخ وصول کرنے کے ساتھ ساتھ وزن میں بھی واضح کمی کر رہے ہیں۔ ایک کلو گوشت کے بجائے گاہکوں کو صرف 900 گرام گوشت فراہم کیا جا رہا ہے اور یہ سلسلہ کئی دنوں سے اعلانیہ جاری ہے۔
شہریوں کا کہنا ہے کہ انتظامیہ کو اس صورتحال سے بخوبی آگاہی ہے، مگر کوئی عملی اقدام نہیں کیا جا رہا۔ مزید برآں شہریوں نے شکایت کی ہے کہ جب بھی قیمت یا تول میں کمی کی نشاندہی کی جاتی ہے تو اکثر دکاندار بدتمیزی پر اتر آتے ہیں۔ بعض اوقات جھگڑے، گالم گلوچ اور بدسلوکی تک نوبت آ جاتی ہے جو کہ ناقابل برداشت ہے۔
شہریوں نے ڈپٹی کمشنر جہلم سے مطالبہ کیا ہے کہ اس سنگین صورتحال کا فوری نوٹس لیا جائے اور کم تولنے، زیادہ نرخ وصول کرنے اور بدتمیزی کرنے والے دکانداروں کے خلاف فوجداری مقدمات درج کیے جائیں۔ شہریوں کا کہنا ہے کہ انتظامیہ اگر بروقت کارروائی کرے تو صورتحال میں بہتری ممکن ہے۔
