جہلم: ضلع جہلم کے صحافیوں کو تاحال اپنے حق، یعنی رہائشی کالونی سے محروم رکھا گیا ہے۔ صحافی کالونی کا قیام وقت کی اہم ضرورت بن چکا ہے اور یہ مطالبہ اب ایک باقاعدہ تحریک میں تبدیل ہو چکا ہے۔
ان خیالات کا اظہار چیئرمین جہلم پریس کلب چوہدری عابد محمود نے صدر الیکٹرانک میڈیا عامر کیانی سے خصوصی گفتگو کرتے ہوئے کیا۔ انہوں نے کہا کہ ضلع جہلم کے صحافی گزشتہ کئی سالوں سے مختلف حکومتوں سے صرف وعدے سنتے آئے ہیں، لیکن عملدرآمد نہ ہونے کے باعث وہ آج بھی بنیادی حق سے محروم ہیں۔
چوہدری عابد محمود نے کہا کہ صحافی حکومت اور عوام کے درمیان ایک پل کا کردار ادا کرتے ہیں، حکومتی اقدامات، منصوبہ جات اور پالیسیوں کی تشہیر میں پیش پیش ہوتے ہیں اور عوامی مسائل کو اجاگر کر کے حکام تک پہنچاتے ہیں، مگر خود اپنے حق کے لیے آج بھی آواز بلند کر رہے ہیں۔
انہوں نے کہا کہ 2006 میں ڈسٹرکٹ انفارمیشن آفیسر کی جانب سے صحافیوں کے کوائف اکٹھے کیے گئے اور 10 صحافیوں کے نام فائنل بھی کیے گئے، لیکن اس کے بعد معاملہ خاموشی کی نذر ہو گیا۔ 2015 میں سابق وزیراعلیٰ پنجاب میاں محمد شہباز شریف نے جہلم میں دانش اسکول کے سنگ بنیاد کی تقریب کے دوران صحافیوں کو آشیانہ ہاؤسنگ سکیم سے پلاٹ دینے کا وعدہ کیا اور ایک فہرست بھی مرتب کی گئی، مگر نامعلوم وجوہات کی بنا پر اس منصوبے پر بھی عمل نہ ہو سکا۔
چوہدری عابد محمود نے بتایا کہ جہلم پریس کلب کی جانب سے حکومت پنجاب کو باقاعدہ طور پر صحافیوں کی فہرستیں بھی فراہم کی گئی تھیں، جو آج بھی حکومتی ریکارڈ کا حصہ ہیں۔ اب صرف آشیانہ ہاؤسنگ اسکیم میں جگہ کی نشاندہی باقی ہے۔
انہوں نے واضح کیا کہ جہلم کے تمام صحافی، جہلم پریس کلب کے پلیٹ فارم پر متحد ہیں، اور صحافی کالونی کے قیام تک یہ تحریک جاری رہے گی۔ اختلاف رائے کو خوش آئند قرار دیتے ہوئے انہوں نے کہا کہ پریس کلب کی چھت تلے ہر صحافی کو اظہارِ رائے کی آزادی حاصل ہے۔
اس موقع پر پریس کلب کے جنرل سیکرٹری الیاس صادق وٹو، صدر الیکٹرانک میڈیا عامر کیانی، سید مظہر عباس نقوی، سینئر نائب صدر ڈاکٹر اعجاز اعوان، سید قلب حسنین، وسیم قریشی، آصف جٹ، عاطف بٹ، غلام قادر مخلص، مرزا راحیل بیگ، سید مستفیض اقبال بخاری، نائب صدر مرزا قدیر بیگ، ملک فدا حسین، عبدالرحمان قادری، یاسر فہمید، شہریار علی راجہ، چوہدری تصور حسین، سید ناصر محمود، چوہدری دانیال عابد، صائمہ سحر، سلطان رضوی، عبدالغفار، ڈیجیٹل میڈیا کے صدر فضل خان، جنرل سیکریٹری محمد ادریس اور سرپرست انیس الرحمن بٹ سمیت دیگر صحافی موجود تھے۔
