سوہاوہ: فلسطینی عوام کے ساتھ اظہارِ یکجہتی اور اسرائیلی مظالم کے خلاف آواز بلند کرنے کے لیے سوہاوہ میں ایک پرامن ریلی نکالی گئی۔
ریلی کا آغاز جی ٹی روڈ سے ہوا اور شرکاء نعرے لگاتے ہوئے مین بوڑ چوک تک پہنچے، جہاں ریلی پُرامن طور پر اختتام پذیر ہوئی۔ ریلی کے شرکاء نے ہاتھوں میں فلسطین کے پرچم اور مختلف بینرز اٹھا رکھے تھے، جن پر فلسطین کی آزادی اور اسرائیلی بربریت کے خلاف نعرے درج تھے۔
ریلی کا مقصد مظلوم فلسطینی عوام کے ساتھ یکجہتی کا اظہار اور ان کی آزادی کی حمایت کرنا تھا۔ اہلِ علاقہ کے علاوہ جماعت اسلامی کے کارکنان کی بڑی تعداد نے بھی ریلی میں شرکت کی۔
مقررین اور شرکاء نے اس عزم کا اعادہ کیا کہ فلسطین کی آزادی تک پاکستانی مسلمان اپنے مظلوم فلسطینی بھائیوں کے شانہ بشانہ کھڑے رہیں گے اور ہر فورم پر ان کی آواز بنیں گے۔
ریلی کے دوران امن و امان کی صورتحال کو برقرار رکھنے کے لیے تھانہ پولیس سوہاوہ کی جانب سے فول پروف سیکیورٹی انتظامات کیے گئے۔ پولیس اہلکاروں نے ذمہ داری اور پیشہ ورانہ مہارت کا مظاہرہ کرتے ہوئے ریلی کی بھرپور نگرانی کی، جس پر شہریوں نے پولیس کی کارکردگی کو سراہا اور انہیں خراج تحسین پیش کیا۔
