جہلم: ضلعی کنوینرملک محمدافضل میر کی قیادت میں گرینڈ ٹیچرزالائنس جہلم کے وفد کی گورنرپنجاب سردار سلیم حیدر خان سے ملاقات۔ اساتذہ کے بڑے مسائل تحریری صورت میں پیش کیے گئے۔ گورنرپنجاب کی ان مسائل کو فوری حل کرنے کی یقین دہانی۔
تفصیلات کے مطابق گورنر پنجاب سردار سلیم حیدر خان کے ضلع جہلم کے دورہ کے دوران گرینڈ ٹیچرز الائنس جہلم کے وفد نے ضلعی کنوینر ملک محمد افضل میر کی قیادت میں ان سے خصوصی ملاقات کی، جس میں اساتذہ کو درپیش اہم مسائل کو تحریری شکل میں پیش کیا گیا۔
ملاقات میں وفد نے اساتذہ کے دیرینہ اور اہم مسائل پر روشنی ڈالتے ہوئے گورنر پنجاب کو مطالبات پیش کیے جن میں ایس ایس ای اساتذہ اور اے ای اوز کی فوری مستقلی، کنٹریکٹ سے مستقل ہونے والے اساتذہ کے لیے پے اینڈ سروس پروٹیکشن، سرکاری اسکولوں کی نجکاری کے عمل کو ختم کرنا، نئے اساتذہ کی فوری بھرتی، ہیڈ ٹیچرز کی خالی اسامیوں پر جلد تقرری، اساتذہ کی تنخواہوں پر 25 فیصد ٹیکس ری بیٹ کی بحالی، ایم فل اساتذہ کے لیے سکیل 17 اور پی ایچ ڈی اساتذہ کے لیے سکیل 18 کی منظوری جیسے اہم نکات شامل تھے۔
وفد میں ضلعی کنوینر ملک محمد افضل میر کے ہمراہ ضلعی کوآرڈینیٹر احسان الٰہی شاکر، چودھری راشد محمود، رانا محمد اشفاق حیدر، چودھری افضل محمود، منظور حسین نظامی، محمد رفیع راجپوت، چودھری بلال خالد، زاہد منظور اور محمد یعقوب شامل تھے۔
گورنر پنجاب سردار سلیم حیدر خان نے اساتذہ کے مسائل کو غور سے سنا اور جلد از جلد ان کے حل کی یقین دہانی کرائی۔ انہوں نے وفد کو یقین دلایا کہ حکومت اساتذہ کے مسائل سے بخوبی آگاہ ہے اور تعلیم کے شعبہ میں بہتری کے لیے ٹھوس اقدامات کیے جا رہے ہیں۔
اساتذہ تنظیم کے نمائندوں نے گورنر پنجاب کا شکریہ ادا کرتے ہوئے اُمید ظاہر کی کہ ان کے جائز مطالبات پر جلد عمل درآمد ہوگا، تاکہ تعلیمی معیار کو بہتر بنانے میں اساتذہ مزید مؤثر کردار ادا کر سکیں۔
