جہلم میں بند مکان کے ایگزاسٹ فین کے سوراخ میں پھنس کر چور جاں بحق ہو گیا۔
تفصیلات کے مطابق جہلم کے علاقے مشین محلہ میں ایک بند مکان سے ایک شخص کی لاش برآمد ہوئی ہے۔ پولیس کے مطابق ابتدائی تحقیقات سے شبہ ظاہر کیا جا رہا ہے کہ متوفی مبینہ طور پر ایگزاسٹ فین کے سوراخ کے ذریعے مکان میں داخل ہونے کی کوشش کے دوران پھنس گیا، جس کے باعث دم گھٹنے سے اس کی موت واقع ہوئی۔
پولیس کے مطابق واقعے کی اطلاع ملنے پر اہلکار موقع پر پہنچے اور لاش کو تحویل میں لے کر ضروری قانونی کارروائی کے بعد ڈی ایچ کیو ہسپتال جہلم منتقل کر دیا گیا۔
ابتدائی معلومات کے مطابق متوفی کی شناخت صدام سکنہ بدلوٹ کے نام سے ہوئی ہے۔ پولیس کا کہنا ہے کہ مذکورہ مکان میں اس وقت کوئی رہائش پذیر نہیں تھا کیونکہ مالک مکان بیرونِ ملک مقیم ہے۔
پولیس کے مطابق ابتدائی شواہد سے شبہ ہے کہ متوفی مبینہ طور پر چوری کی نیت سے ایگزاسٹ فین کے سوراخ کے ذریعے گھر میں داخل ہونے کی کوشش کر رہا تھا، تاہم سوراخ میں پھنس جانے کے باعث اس کا دم گھٹ گیا۔ تاہم پولیس نے واضح کیا ہے کہ واقعے کی تمام وجوہات کا تعین تفتیش مکمل ہونے اور فرانزک رپورٹ آنے کے بعد ہی کیا جا سکے گا۔
واقعے کے بعد فرانزک ٹیمیں موقع پر پہنچ گئیں اور شواہد اکٹھے کرنے کے ساتھ مختلف پہلوؤں سے تحقیقات جاری ہیں۔
