جہلم: ڈپٹی کمشنر جہلم میثم عباس کی خصوصی ہدایت پر شہر میں حالیہ شدید گرمی اور ہیٹ ویو سے شہریوں کو محفوظ رکھنے کے لیے ضلعی انتظامیہ متحرک ہو گئی۔
جہلم شہر کے مختلف اہم مقامات پر محکمہ صحت کے تعاون سے ایمرجنسی میڈیکل کیمپس قائم کر دیے گئے ہیں جہاں گرمی کی شدت سے متاثرہ افراد کو فوری طبی امداد فراہم کی جا رہی ہے۔
میڈیکل کیمپس شاندار چوک، ریلوے اسٹیشن، لاری اڈا سمیت دیگر اہم مقامات پر قائم کیے گئے ہیں جو مکمل طور پر فعال ہیں اور طبی عملہ چوبیس گھنٹے موجود رہ کر خدمات سرانجام دے رہا ہے۔ کیمپس میں پانی، او آر ایس، پنکھے اور ابتدائی طبی امداد کے تمام ضروری انتظامات کیے گئے ہیں تاکہ گرمی سے بے ہوش یا متاثرہ افراد کو فوری طور پر ریلیف فراہم کیا جا سکے۔
اس کے ساتھ ساتھ ضلعی انتظامیہ کی جانب سے شہریوں میں ہیٹ ویو سے بچاؤ کے لیے آگاہی مہم بھی بھرپور انداز میں جاری ہے۔ اس مہم کے تحت شہر کے مختلف علاقوں میں شہریوں میں پمفلٹس تقسیم کیے جا رہے ہیں جن میں گرمی سے بچاؤ کے لیے احتیاطی تدابیر درج ہیں۔
ڈپٹی کمشنر میثم عباس نے شہریوں سے اپیل کی ہے کہ محکمہ موسمیات کی وارننگ کو سنجیدگی سے لیں، غیر ضروری طور پر دھوپ میں نکلنے سے گریز کریں، سر کو ڈھانپ کر رکھیں، زیادہ سے زیادہ پانی پیئیں اور آگاہی پمفلٹس میں دی گئی ہدایات پر مکمل عمل کریں۔
انہوں نے کہا کہ ضلعی انتظامیہ شہریوں کی صحت اور سلامتی کو یقینی بنانے کے لیے ہر ممکن اقدامات کر رہی ہے، اور ہیٹ ویو کے دوران کسی بھی ہنگامی صورتحال سے نمٹنے کے لیے تمام ادارے الرٹ ہیں۔
