جہلم شہر اور اس کے مضافاتی علاقوں میں موٹے موٹے چوہوں اور اندرون شہر کے گلی محلوں میں آوارہ کتوں کی بڑھتی ہوئی تعداد نے شہریوں کا جینا دوبھر کر دیا ہے۔
گلی محلوں، بازاروں اور رہائشی آبادیوں میں آوارہ کتوں کا کھلے عام گھومنا روزمرہ معمول بن چکا ہے، جس کے باعث شہریوں میں شدید خوف و ہراس پایا جاتا ہے اور ان کی روزمرہ زندگی شدید متاثر ہو رہی ہے۔
شہریوں کے مطابق مضافاتی علاقوں میں چوہے گھروں اور دکانوں میں داخل ہو کر خوراک، کپڑے، اور دیگر قیمتی اشیاء کو نقصان پہنچا رہے ہیں۔ کئی علاقوں سے چوہوں کے کاٹنے کے واقعات بھی رپورٹ ہوئے ہیں، جو بچوں اور خواتین کے لیے خطرناک صورتحال اختیار کر چکے ہیں۔
دوسری جانب آوارہ کتے دن ہو یا رات، ٹولیوں کی صورت میں گلیوں، محلوں، اور چوک چوراہوں میں بے خوف گھومتے نظر آتے ہیں۔ راہگیروں، موٹر سائیکل سواروں، اور خاص طور پر چھوٹے بچوں پر ان کے حملے معمول بن چکے ہیں، جس سے زخمی ہونے کے واقعات میں اضافہ ہو رہا ہے۔
شہریوں نے ضلعی انتظامیہ اور متعلقہ حکام سے فوری نوٹس لینے اور مؤثر اقدامات اٹھانے کا مطالبہ کیا ہے تاکہ عوام کو تحفظ اور سکون کی فضا فراہم کی جا سکے۔
