جہلم پولیس نے اہم کارروائی کرتے ہوئے ڈکیتی کی واردات میں ملوث سجاول گینگ کے چار ملزمان کو گرفتار کر لیا۔ پولیس نے ملزمان کے قبضے سے واردات میں چھینی گئی نقدی، ناجائز اسلحہ اور واردات میں استعمال ہونے والا موٹر سائیکل بھی برآمد کر لیا ہے۔
تفصیلات کے مطابق جہلم میں ایس ایچ او تھانہ سول لائنز اور ان کی ٹیم نے کارروائی کرتے ہوئے ملزمان کو قلیل وقت میں ٹریس کر کے گرفتار کیا۔ پولیس کے مطابق ملزمان کے قبضے سے ڈکیتی میں چھینی گئی 2 لاکھ 50 ہزار روپے نقدی، ناجائز اسلحہ پسٹل 30 بور معہ ایمونیشن اور واردات میں استعمال ہونے والا موٹر سائیکل برآمد کر لیا گیا ہے۔
پولیس حکام کا کہنا ہے کہ گرفتار ملزمان سے مزید تفتیش جاری ہے اور انہیں ٹھوس شواہد کے ساتھ عدالت میں پیش کیا جائے گا تاکہ انہیں قرار واقعی سزا دلائی جا سکے۔
ڈی پی او جہلم شفیق احمد چوہدری نے کہا ہے کہ شہریوں کی جان و مال کا تحفظ پولیس کی اولین ترجیح ہے اور شہریوں کو ان کے قیمتی اثاثوں سے محروم کرنے والے ملزمان کسی رعایت کے مستحق نہیں۔
