جہلم: ڈسٹرکٹ جیل جہلم میں ہنگامی حالات سے نمٹنے کی تیاریوں کو جانچنے کے لیے ایک اہم موک ایکسرسائز کا انعقاد کیا گیا، جس کا مقصد سیکیورٹی اداروں کے درمیان ہم آہنگی کو بہتر بنانا اور رسپانس ٹائم کو کم سے کم کرنا تھا۔
مشق کے دوران ڈی ایس پی سٹی مرزا عبدالجبار اور سول ڈیفنس آفیسر جہلم محمد بوٹا نے تمام مراحل کی نگرانی کی اور سیکیورٹی انتظامات کا تفصیلی جائزہ لیا۔
موک ایکسرسائز کے دوران جیل کا سائرن بجتے ہی ضلعی پولیس، ایلیٹ فورس، ریسکیو 1122 اور سول ڈیفنس کے بم ڈسپوزل اسکواڈ نے فوری طور پر اپنی پوزیشنز سنبھال لیں۔ مشق میں ہنگامی صورتحال سے نمٹنے، قیدیوں کی حفاظت یقینی بنانے اور ممکنہ بیرونی حملوں کو ناکام بنانے کے عملی اقدامات کا مظاہرہ کیا گیا۔
ڈی ایس پی سٹی مرزا عبدالجبار نے پولیس فورس کی بروقت اور مؤثر کارروائی کو سراہا جبکہ سول ڈیفنس آفیسر محمد بوٹا نے بم ڈسپوزل اسکواڈ کی پیشہ ورانہ تیاریوں کا جائزہ لیا۔
مشق کے اختتام پر سپرنٹنڈنٹ ڈسٹرکٹ جیل جہلم نے تمام اداروں کی کارکردگی کو سراہتے ہوئے کہا کہ جیل کی سیکیورٹی کو ہر سطح پر فول پروف بنانا اولین ترجیح ہے۔
انہوں نے واضح کیا کہ اس نوعیت کی مشقیں مستقبل میں بھی جاری رکھی جائیں گی تاکہ سیکیورٹی انتظامات کو مزید مؤثر بنایا جا سکے اور تمام ادارے کسی بھی ہنگامی صورتحال میں فوری اور منظم انداز میں ردعمل دے سکیں۔
