دینہ: ایگزیکٹو باڈی کے تحلیل ہونے اور صحافتی اتحاد میں دراڑ کے بعد دینہ پریس کلب کو دوبارہ بحال کر دیا گیا ہے، جبکہ سینئر صحافی پروفیسر خورشید علی ڈار اور نوجوان صحافی ظہیر عباس بھی پریس کلب کا حصہ بن گئے ہیں۔
تفصیلات کے مطابق گزشتہ چند ماہ سے جہلم کی تحصیل دینہ کے صحافتی میدان میں آنے والے غیر معمولی نشیب و فراز کے بعد دینہ پریس کلب کو دوبارہ بحال کر دیا گیا، دینہ پریس کلب کی بحالی کا باضابطہ اعلان صدر دینہ پریس کلب سید توقیر آصف شاہ نے پریس کلب کے منعقدہ خصوصی اجلاس میں کیا۔
اجلاس میں سرپرست اعلیٰ امجد محمود سیٹھی، چیئرمین خورشید علی ڈار، صدر سید توقیر آصف شاہ، سینئر نائب صدر عرفان محبوب، نائب صدر سہیل انجم قریشی، جنرل سیکرٹری چوہدری عادل حسین، جوائنٹ سیکرٹری احمد ندیم، انفارمیشن سیکرٹری ظہیر عباس، رضوان سیٹھی ، حاجی اظہر چوہدری ، ڈاکٹر ظہیر احمد اور سعید میر نے شرکت کی۔
اجلاس سے خطاب کرتے ہوئے سرپرست اعلیٰ امجد محمود سیٹھی نے کہا کہ صحافیوں کے اتحاد کے لیے بھرپور کوششیں کی گئیں، تاہم چند افراد کے غیر ذمہ دارانہ رویے کے باعث ایگزیکٹو باڈی تحلیل کرنے کا مشکل فیصلہ کرنا پڑا۔
صدر سید توقیر آصف شاہ نے نئے شامل ہونے والے صحافیوں کو خوش آمدید کہتے ہوئے اس عزم کا اظہار کیا کہ دینہ پریس کلب صحافتی اقدار کے فروغ اور معاشرے کی بہتری کے لیے اپنا مثبت کردار ادا کرتا رہے گا۔
