دینہ: ڈپٹی کمشنر جہلم میر رضا اوزگن نے ستھرا پنجاب پروگرام کے تحت جاری صفائی مہم کا جائزہ لینے کے لیے میونسپل کمیٹی دینہ اور یونین کونسل پنڈوری کا دورہ کیا، جہاں انہوں نے صفائی کے انتظامات، ویسٹ مینجمنٹ اور فیلڈ آپریشنز کا تفصیلی معائنہ کیا۔
دورے کے دوران ڈپٹی کمشنر نے صفائی کی مجموعی صورتحال، ویسٹ کلیکشن پوائنٹس، کچرے کی بروقت منتقلی، فیلڈ عملے کی کارکردگی اور جاری صفائی آپریشنز کا جائزہ لیا۔ انہوں نے متعلقہ افسران کو ہدایت کی کہ شہری اور دیہی دونوں علاقوں میں صفائی کے معیار کو مزید بہتر بنایا جائے اور تمام سرگرمیاں مقررہ اہداف کے مطابق جاری رکھی جائیں۔
ڈپٹی کمشنر میر رضا اوزگن نے کہا کہ وزیراعلیٰ پنجاب مریم نواز شریف کے وژن کے مطابق ضلع بھر میں یکساں معیار کی صفائی کو یقینی بنایا جا رہا ہے۔ انہوں نے فیلڈ ٹیموں کو ہدایت کی کہ ویسٹ کلیکشن، کچرے کی بروقت منتقلی، صفائی اور فیلڈ مانیٹرنگ میں کسی قسم کی غفلت یا کوتاہی برداشت نہیں کی جائے گی۔
دورے کے موقع پر ڈپٹی کمشنر نے مختلف مقامات پر صفائی کے انتظامات کا معائنہ کرتے ہوئے متعلقہ افسران کو موقع پر ضروری ہدایات بھی جاری کیں تاکہ ستھرا پنجاب پروگرام کے اہداف مؤثر انداز میں حاصل کیے جا سکیں اور شہریوں کو صاف ستھرا ماحول فراہم کیا جا سکے۔
انہوں نے اس عزم کا اظہار کیا کہ ضلعی انتظامیہ عوام کو بہتر بلدیاتی سہولیات کی فراہمی اور صفائی کے نظام کو مزید مؤثر بنانے کے لیے مسلسل نگرانی اور فیلڈ مانیٹرنگ کا عمل جاری رکھے گی۔
