جہلم میں گزشتہ پانچ روز سے وقفے وقفے سے جاری بارشوں نے شہری نظامِ زندگی کو متاثر کرکے رکھ دیا، متعدد نشیبی علاقے زیرِ آب آگئے جبکہ شہر کی گلیاں، محلے اور اہم سڑکیں بارشی پانی سے بھر گئیں۔
تفصیلات کے مطابق مسلسل بارش کے باعث جہلم شہر کے مختلف علاقوں میں نکاسی آب کا نظام دباؤ کا شکار ہوگیا۔ کئی مقامات پر بارشی پانی سڑکوں اور گلیوں میں جمع ہونے سے شہریوں کو گھروں سے نکلنے میں دشواری کا سامنا کرنا پڑا۔
بارشی پانی جمع ہونے کے باعث موٹر سائیکل سواروں، رکشہ ڈرائیوروں اور پیدل چلنے والے شہریوں کو بالخصوص مشکلات پیش آئیں، جبکہ اہم شاہراہوں پر پانی کھڑا ہونے سے ٹریفک کی روانی بھی متاثر ہوئی اور شہریوں کو آمدورفت میں شدید دشواری کا سامنا کرنا پڑا۔
شہریوں کا کہنا ہے کہ مسلسل بارش کے دوران بعض علاقوں میں نکاسی آب کے مناسب انتظامات نہ ہونے کے باعث صورتحال مزید خراب ہو رہی ہے۔ کئی گلیاں اور سڑکیں پانی جمع ہونے سے تالاب کا منظر پیش کرتی رہیں۔
دوسری جانب محکمہ موسمیات کی جانب سے جہلم اور گردونواح میں مزید بارشوں کی پیشگوئی کے باعث شہریوں میں تشویش پائی جا رہی ہے۔
شہریوں نے ضلعی انتظامیہ اور متعلقہ اداروں سے مطالبہ کیا ہے کہ نشیبی علاقوں، گلیوں اور اہم شاہراہوں سے بارشی پانی کی فوری اور مؤثر نکاسی کے انتظامات کیے جائیں تاکہ مزید بارش کی صورت میں شہریوں کو مشکلات اور ممکنہ نقصانات سے محفوظ رکھا جا سکے۔
