جہلم: ایڈیشنل ڈپٹی کمشنر میونسپل سروسز جہلم علیزہ ریحان کی زیرِ صدارت تاجر تنظیموں کے نمائندگان کا اہم اجلاس منعقد ہوا، جس میں تاجر برادری کو درپیش مسائل، میونسپل سروسز اور تجارتی علاقوں میں شہری سہولیات کی بہتری کے حوالے سے تفصیلی تبادلہ خیال کیا گیا۔
اجلاس میں اسسٹنٹ کمشنر جہلم عبداللہ غازی خان اور حمزہ اظہر کیانی بھی موجود تھے۔
اجلاس کے دوران تاجر تنظیموں کے نمائندگان نے اپنے مسائل، تحفظات اور تجاویز پیش کیں۔ اس موقع پر صفائی ستھرائی، میونسپل سروسز، تجارتی علاقوں میں بنیادی سہولیات سمیت دیگر متعلقہ امور کا جائزہ لیا گیا۔
ایڈیشنل ڈپٹی کمشنر میونسپل سروسز علیزہ ریحان نے تاجر نمائندگان کے مسائل تفصیل سے سنے اور متعلقہ امور کے حل کے لیے ضروری اقدامات کی یقین دہانی کرائی۔ انہوں نے کہا کہ تاجر برادری کے جائز مسائل کا مؤثر اور بروقت حل ضلعی انتظامیہ کی ترجیحات میں شامل ہے۔
انہوں نے متعلقہ افسران کو ہدایت کی کہ تاجروں کی جانب سے نشاندہی کیے گئے جائز مسائل کا فوری جائزہ لے کر ان کے حل کے لیے عملی اقدامات اور مؤثر فالو اَپ یقینی بنایا جائے تاکہ تجارتی علاقوں میں شہری سہولیات مزید بہتر ہو سکیں۔
