جہلم: سرکاری سکولوں کی نجکاری اساتذہ کی گرفتاری کے خلاف ضلع بھر کے سرکاری تعلیمی اداروں کے اساتذہ نے وائے کر اس سے ڈپٹی کمشنر کے دفتر تک ریلی نکالی، اساتذہ نے نگران پنجاب حکومت کے خلاف شدید نعرے بازی کی، خواتین کی کثیر تعداد میں شرکت ۔
تفصیلات کے مطابق سکولوں کی نجکاری اور اساتذہ کی گرفتاریوں کے خلاف سرکاری ملازمین جہلم میں سڑکوں پر آگئے ، ہزاروں کی تعداد میں سرکاری ملازمین نے وائے کراس سے ڈپٹی کمشنر دفتر تک احتجاجی ریلی نکالی ، شرکاء کے ہاتھوں میں پینا فلیکس ، بینرز اور کتبے تھے، جن پر نگران حکومت کے خلاف نعرے درج تھے۔
ملازمین کا کہنا ہے کہ نگران حکومت لیو انکیشمنٹ کے قوانین میں ترامیم کررہی ہے ۔ اور سکولوں کی نجکاری کی جارہی ہے ۔ ہم ایسے کالے قانون کو نہیں مانتے ۔ نگران حکومت سے مطالبہ ہے کہ ملازمین کو تحفظ فراہم کرنے کی بجائے ملازمین کش پالیسیاں ترک کریں تاکہ بچوں سمیت اساتذہ و ملازمین کا مستقبل محفوظ رہ سکے۔
اس موقع پر پولیس کی بھاری نفری موجود تھی۔پولیس نے فول پروف انتظامات کررکھے تھے۔احتجاجی مظاہرے کے بعد سرکاری ملازمین پرامن طور پر منتشر ہو گئے ۔
یاد رہے کہ جہلم میں اساتذہ کے احتجاج کے وجہ سے سرکاری سکول بند ہیں ۔
