پیرس: فرانس میں پاکستان کی سفیر ممتاز زہرہ بلوچ نے فرانسیسی وزارت خارجہ کے ڈپٹی چیف آف پروٹوکول کو سفارتی اسناد کی نقول پیش کیں۔ کیریئر ڈپلومیٹ ممتاز زہرہ بلوچ نے جنوری 2025 میں فرانس میں پاکستان کی سفیر اور یونیسکو میں مستقل مندوب کے طور پر ذمہ داریاں سنبھالیں۔
فرانس کی معروف کاروباری و سماجی شخصیت، چیئرمین پاکستان بزنس فورم فرانس سردار ظہور اقبال نے سفیر ممتاز زہرہ بلوچ کو خوش آمدید کہا اور امید ظاہر کی کہ وہ فرانس اور پاکستان کے بہتر تعلقات کے لیے اپنی صلاحیتوں کو بروئے کار لائیں گی۔
صدر پاکستان بزنس فورم فرانس حاجی محمد اسلم چوہدری اور فرانس کی پاکستانی کمیونٹی کے مختلف مکتبہ فکر کے نمائندوں، مرزا ساجد جرال کشمیری رہنما، مسلم لیگ ن فرانس کے چیئرمین راجہ علی اصغر، بزنس فورم کے سرپرستِ اعلیٰ محمد ابراہیم ڈار، ممتاز بزنس مین و نجی میڈیا گروپ کے مالک حمزہ تاج سکھیرا، تحریک انصاف کے سینئر رہنما چوہدری گلزار لنگڑیال، شیخ نعمت اللہ، مسلم لیگی سینئر رہنما چوہدری قادر، بزنس مین و مقامی کونسلر سبط مزمل، ن لیگی رہنما چوہدری افضل لنگاہ، بزنس مین راجہ مظہر ذمہ واریہ، چیئرمین عصمت اللہ تارڑ، جنرل سیکریٹری بزنس فورم فرانس یاسر خان، اور چوہدری منیر وڑائچ نے محترمہ ممتاز زہرہ بلوچ کو اپنے پیغام میں خوش آمدید کہا اور ان کی بطور سفیر فرانس تعیناتی پر نیک خواہشات کا اظہار کیا۔
سفیر ممتاز زہرہ بلوچ اس سے قبل وزارت خارجہ کی ترجمان اور ایڈیشنل سیکرٹری (اسٹریٹجک کمیونیکیشن ڈویژن اینڈ پبلک ڈپلومیسی) کے طور پر خدمات انجام دے رہی تھیں۔ ممتاز زہرہ بلوچ نے پنجاب یونیورسٹی لاہور سے فزکس میں ماسٹرز کی ڈگری حاصل کی، فلیچر اسکول آف لاء اینڈ ڈپلومیسی امریکہ سے بین الاقوامی تعلقات میں ماسٹرز، اور نیشنل ایڈمنسٹریشن اسکول فرانس سے پبلک ایڈمنسٹریشن میں ڈگری حاصل کی۔
ممتاز زہرہ بلوچ جمہوریہ کوریا میں پاکستان کی سفیر اور چین میں پاکستانی سفارت خانے میں منسٹر/ڈپٹی ہیڈ آف مشن کے طور پر خدمات انجام دے چکی ہیں۔ وہ سفارت خانہ پاکستان، واشنگٹن ڈی سی میں سیاسی امور کی قونصلر اور اقوام متحدہ، جنیوا میں پاکستان کے مستقل مشن میں سیکنڈ سیکرٹری کے طور پر بھی کام کر چکی ہیں۔
انہوں نے وزارت خارجہ اسلام آباد میں ایڈیشنل سیکرٹری خارجہ، ایشیا اینڈ پیسفک، ڈائریکٹر امریکہ، ڈائریکٹر سلامتی کونسل و انسانی حقوق، اور ڈائریکٹر اسٹریٹجک پلاننگ کے طور پر خدمات انجام دیں۔
ممتاز زہرہ بلوچ نے ڈائریکٹر (اکیڈمک پروگرام) اور بعد ازاں فارن سروس اکیڈمی اسلام آباد کی قائم مقام ڈائریکٹر جنرل کے طور پر بھی خدمات انجام دیں۔
