جہلم: پنجاب فوڈ اتھارٹی نے سردیوں کی سوغات، ناقص خشک میوہ جات (ڈرائی فروٹس) فروخت کرنے والوں کو کھلی چھوٹ دے دی۔ ناقص، فنگس زدہ ڈرائی فروٹس کی سرعام فروخت جاری، چیکنگ نہ ہونے کی وجہ سے شاندار چوک میں خشک میوہ کی مارکیٹ قائم ہو گئی۔
تفصیلات کے مطابق جہلم شہر کے عین وسط میں واقع شاندار چوک میں درجنوں ڈرائی فروٹ کی دکانیں قائم ہوچکی ہیں ، جہاں پچھلے کئی کئی سالوں سے ذخیرہ کیا گیا ڈرائی فروٹ جس میں بادام ، کاجو، اخروٹ، مونگ پھلی ، خوبانی ، ناریل، کشمش، چھوہارے سمیت دیگر ڈرائی فروٹ شامل ہے دکاندار دیدہ دلیری کے ساتھ مہنگے داموں فروخت کرتے دکھائی دیتے ہیں جو کہ پنجاب فوڈ اتھارٹی ضلع جہلم کے ذمہ داران کی آنکھوں سے اوجھل ہے۔
شہریوں کا کہنا ہے کہ پنجاب فوڈ اتھارٹی کا چیک اینڈ بیلنس کا نظام مفلوج ہونے کی وجہ سے دکانداروں نے کئی کئی من ڈرائی فروٹ دکانوں اور گوداموں کے اندر محفوظ کررکھا ہے ، قابل ذکر بات یہ ہے کہ دکانداروں نے من مرضی کے نرخ مقرر کرکے ڈرائی فروٹ کی فروخت شروع کررکھی ہے ۔
شہریوں کا کہنا ہے کہ باسی ، ناقص اور فنگس زدہ ڈرائی فروٹ استعمال کرنے سے شہری موذی امراض میں مبتلا ہو رہے ہیں۔ پنجاب فوڈ اتھارٹی ضلع جہلم کے ذمہ داران کو ڈرائی فروٹ شاپس کو چیک کرنے کا پابند بنایا جائے تاکہ شہری بیماریوں سے محفوظ رہ سکیں ۔
