جہلم کے نواحی علاقہ بالا گجراں میں آستانہ عالیہ فریدیہ حسینیہ شریف میں جشن عید میلادالنبی ﷺ کے حوالے سے عظیم الشان محفل کا انعقاد کیا گیا۔
یہ روح پرور محفل زیر سرپرستی حضرت علامہ پیر سید ظہور احمد کاظمی منعقد ہوئی۔ تقریب کا باقاعدہ آغاز تلاوت قرآن پاک سے ہوا جس کی سعادت قاری امجد صابری نے حاصل کی۔
بعد ازاں سید مبشر علی کاظمی، قاری شاہنواز چشتی اور پیر سید صابر حسین کاظمی نے نعت رسول مقبول ﷺ پیش کر کے محفل کو روحانی کیف و سرور سے معمور کر دیا۔
اس موقع پر معروف عالم دین علامہ پیر سید انوار شاہ کاظمی نے خصوصی خطاب کیا جس نے شرکائے محفل کے دلوں کو مزید منور کر دیا، جبکہ تقریب کی صدارت زاہد حسین کاظمی نے کی۔
محفل کے اختتام پر حضرت پیر سید ظہور احمد کاظمی نے امت مسلمہ کی خیر و عافیت، وطن عزیز پاکستان کی ترقی و خوشحالی اور حالیہ سیلاب سے متاثرہ خاندانوں کے لیے خصوصی دعا کرائی۔ آخر میں حاضرین محفل میں لنگر پاک بھی تقسیم کیا گیا۔
