جہلم: میونسپل کمیٹی جہلم میں اندھیر نگری چوپٹ راج نامعلوم شخص نے شہر کے چوک چوراہوں میں ڈیڑھ درجن سے زائد ہولڈنگ بورڈ نصب کر دیے ،میونسپل کمیٹی کے ذمہ داران خواب خرگوش کے مزے لینے میں مصروف میونسپل کمیٹی کو بورڈ ٹیکس جمع نہ ہونے سے لاکھوں کی پھکی ،شہری سراپا احتجاج ہیں۔
تفصیلات کے مطابق بااثر شخص نے لاکھوں روپے ماہانہ کمانے لے لیے بغیر این ا و سی کے اندرون شہر کے چوک چوراہوں ،سٹرکوں پر ڈیڈھ درجن سے زائد 8×16کے ہولڈنگ بورڈ نصب کر دئے جو کسی بھی وقت کسی بڑے حادثے کا پیش خیمہ ثابت ہو سکتے ہیں۔
قابل ذکر بات یہ ہے کہ جب ہولڈنگ بورڈ کے حوالے سے میونسپل کمیٹی میں رابطہ قائم کیا گیا تو متعلقہ ذمہ داران نے لاعلمی کا اظہار کیا۔
میونسپل کمیٹی کی حدود میں بورڈ نصب کرنے کے لیے متعلقہ شعبوں سے اجازت درکار ہوتی ہے اس کے بعد چالان بنک میں جمع کروانا ہوتا ہے اور باقاعدہ میونسپل کمیٹی ہولڈنگ بورڈ کے مالک کے مابین اشٹام پیپر ز پر معائدہ کیا جاتا ہے جس کا کوئی وجود موجود نہیں۔
شہریوں نے اخبار نویسوں سے گفتگو کرتے ہوئے کہا کہ میونسپل کمیٹی کی حدود میں جنگل کا قانون نافذ ہے ،سرکاری اراضی پر بااثر افراد قبضے کر رہے ہیں ،میونسپل کمیٹی کے عملے کی ملی بھگت سے بااثر دکاندار سر بمہر دکانوں سے اپنے سامان کو دوسری دکانوں میں منتقل کر رہے ہیںجبکہ میونسپل کمیٹی کے عملے نے سرکاری اراضی بااثر افراد کے ساتھ ساز باز کر کے غیر قانونی طریقے سے کرائیوں پر چڑھا رکھی ہے۔
شہریوں نے ڈپٹی کمشنر سیدہ رملہ علی ، ایڈوائزر صوبائی محتسب پنجاب ، ایڈیشنل ڈپٹی کمشنر جنرل /ایڈمنسٹریٹر میونسپل کمیٹی سے غیر قانونی بورڈ نصب کرنے والے شخص کے خلاف فوجداری مقدمہ درج کرنے اور تمام بورڈ بحق سرکار ضبط کرنے کا مطالبہ کیا ہے ۔
