جہلم: سریا، سیمنٹ، اینٹیں و دیگر تعمیراتی میٹریل مہنگا ہونے سے عام دیہاڑی دار مزدور طبقہ کسمپرسی کی زندگیاں گزارنے پر مجبورہیں، مزدور طبقہ مہنگائی کا رونا روتا دکھائی دیتا ہے ، میٹریل مہنگا ہونے کے باعث تعمیراتی کام بند ہونے کیوجہ سے ہفتوں کام نہ ملنے کیوجہ سے مزدوروں کو فارغ بیٹھنا پڑتا ہے۔
تفصیلات کے مطابق پچھلے چند ماہ سے مہنگائی کی لہر سے تعمیراتی میٹریل کی قیمتوں میں کئی گنا اضافہ ہوجانے کے باعث تعمیراتی کام بالکل ٹھپ ہو چکے ہیں اور دیہاڑی دار طبقہ بری طرح متاثر ہوا ہے۔ تعمیراتی کام بند ہونے کیوجہ سے غریبوں کے مسائل میں بے تحاشہ اضافہ دیکھنے میں آیا ہے۔
مزدوروں کو پہلے کام آسانی سے مل جاتا تھا لیکن اس جان لیوا مہنگائی جس میں میٹریل بالخصوص سریا، سیمنٹ اینٹوں کی قیمتیں آسمانوں سے باتیں کر رہی ہیں مقامی سطح پر تعمیراتی کام تقریباً ٹھپ ہوکر رہ گئے ہیں یا پھر بہت ہی کم تعمیرات ہو رہی ہیں مستری مزدور سارا سارا دن شہر کے چوک چوراہوں میں کام نہ ملنے کیوجہ سے شام کو مایوس گھروں کو لوٹ جاتے ہیں۔
مزدوروں کو اگر کام مل بھی جائے تو زیادہ عرصہ کا نہیں ہوتا مگر بجلی ، سوئی گیس کے بلوں ، کھانے پینے کی اشیاء اور بچوں کی تعلیم کے اخراجات اور مہنگی ادویات کے بل برابران کو ہر ماہ باقاعدگی سے ادا کرنا ہوتے ہیں جس سے مزدور افراد پر یشانیوں میں مبتلا ہو چکے ہیں اور اپنے گھر یلو حالات بالخصوص اپنے بچوں کے بارے خاصے پریشان نظر آتے ہیں۔
مزدوروں نے حکومت سے مطالبہ کیاہے کہ تعمیراتی میٹریل کی قیمتوں میں کمی کروائی جائے تاکہ محنت کش طبقہ اپنے بچوں کو 2 وقت کی روٹی مہیا کر سکیں ۔
