ضلع جہلم میں پیپلز پارٹی بھرپور طریقے سے الیکشن میں حصہ لے گی، راجہ پرویز اشرف

پڑی درویزہ/ سوہاوہ: راجہ پرویز اشرف نے کہا کہ پاکستان پیپلز پارٹی ملک کی سب سے بڑی عوامی سیاسی جماعت ہے، پاکستان پیپلز پارٹی ضلع جہلم کے اندر بھر پور طریقے سے الیکشن میں حصہ لے گی ۔

سپیکر قومی اسمبلی راجہ پرویز نے پاکستان پیپلز پارٹی ضلع جہلم کے صدر چوہدری تسنیم ناصر گجر، جنرل سیکریٹری مرزا عبدالغفار اور امیدوار برائے قومی اسمبلی حلقہ این اے 61پیر حمزہ کرمانی سے قومی اسمبلی سیکریٹریٹ میں سے ملاقات کے دوران کہا کہ پیپلز پارٹی واحد جماعت ہے جس میں زندگی سے تعلق رکھنے والے تمام طبقات طلباء ، نوجوانوں ، مزدوروں اور کسانوں کی برابر نمائندگی شامل ہے، پی پی پی ہی ملک کو موجودہ بحرانوں سے نکال سکتی ہے۔

انہوں نے کہا کہ آمدہ الیکشن 2024ء میں ملک بھر کی سب سے بڑی سیاسی جماعت ثابت ہو گی ۔ پوری ملک کی طرح ضلع جہلم کے دو قومی اور تین صوبائی حلقوں سے بھر پورطریقے سے الیکشن میں حصہ لے گی ۔

اس موقع پرممبر پنجاب کونسل مرکزی پنجاب راجہ ذوالفقارعلی، امیدوار برائے ایم پی اے نذر حسین گوندل، ڈپٹی سیکرٹری اطلاعات، انچارج ریسرچ اینڈ کوارڈینیشن سیل راولپنڈی ڈویژن راجہ فرزند علی موجود تھے۔