جہلم کے نواحی علاقہ میں بریک فیل ہونے سے سکول وین گہری کھائی میں گر گئی، 14 بچوں سمیت 16 افراد زخمی ہو گئے۔ ڈرائیور اور ایک بچے کو تشویشناک حالت میں ہسپتال منتقل کر دیا گیا۔
تفصیلات کے مطابق جہلم کے تھانہ چوٹالہ کے علاقہ پنڈسوکہ کے قریب سکول وین بریک فیل ہونے کے باعث گہری کھائی میں جاگری جس کے نتیجے میں 14بچوں سمیت 16افراد زخمی ہو گئے۔
زخمیوں میں سکول کے بچے، ٹیچراور وین ڈرائیور شامل ہیں۔ مقامی افراد نے اپنی مدد آپ کے تحت تمام زخمی افراد کو گاڑی سے نکال کر بنیادی مرکز صحت نکہ خلاص پور منتقل کیا۔
13بچے اور سکول ٹیچر معمولی زخمی ہوئے جنہیں طبعی امداد کے بعد گھر بھیج دیا گیا جبکہ ڈرائیور اور ایک بچے کی حالت تشویشناک ہونے کے باعث ڈسٹرکٹ ہیڈ کوارٹر ہسپتال جہلم منتقل کر دیا گیا۔
ذرائع سے معلوم ہوا ہے کہ حادثہ اوور لوڈنگ اور بریک فیل ہونے کے باعث پیش آیا۔
