جہلم: ڈسٹرکٹ ہیڈکوارٹر اسپتال جہلم میں شوگر کی ویکسین نایاب ہونے کے باعث مریضوں اور ان کے لواحقین کو شدید مشکلات کا سامنا ہے۔
روزے کی حالت میں مریض سارا دن لمبی قطاروں میں کھڑے رہنے پر مجبور ہوتے ہیں، جبکہ کئی گھنٹے انتظار کے بعد بتایا جاتا ہے کہ ویکسین ختم ہو چکی ہے۔
شہریوں نے میڈیا نمائندگان سے گفتگو کرتے ہوئے شکایت کی کہ اسپتال انتظامیہ صبح سویرے مریضوں کو قطاروں میں کھڑا کر دیتی ہے لیکن دن کے آخر میں یہ کہہ کر واپس بھیج دیا جاتا ہے کہ ویکسین دستیاب نہیں۔ خاص طور پر بزرگ شہریوں اور روزہ داروں کے لیے یہ صورتحال ناقابل برداشت ہے اور ان کے ساتھ زیادتی کے مترادف ہے۔
مریضوں اور ان کے اہل خانہ نے وزیراعلیٰ پنجاب مریم نواز شریف، چیف سیکرٹری پنجاب اور سیکرٹری صحت سے فوری نوٹس لینے کا مطالبہ کیا ہے۔ ان کا کہنا ہے کہ شوگر کے مریضوں کو ویکسین کی فراہمی یقینی بنائی جائے تاکہ وہ بلا تعطل اپنا علاج جاری رکھ سکیں اور رمضان المبارک کے دوران کسی قسم کی پریشانی کا شکار نہ ہوں۔
