جہلم: ضلع بھر میں امن و امان کی صورتحال کو بہتر بنانے کے لیے پولیس نے سپیشل سرچ آپریشنز اور ناکہ بندی کی کارروائیاں کیں۔
ترجمان جہلم پولیس کے مطابق پولیس نے 14 مختلف مقامات پر سرچ آپریشنز کے دوران 382 افراد، 164 گھروں اور 19 بس اسٹینڈز و ہوٹلز کو چیک کیا۔ کارروائی کے دوران ایک غیر قانونی طور پر مقیم افغان شہری کو گرفتار کیا گیا جبکہ 44 افراد کی کرایہ داری کا اندراج بھی کیا گیا۔
پولیس کے مطابق یہ کارروائیاں دہشت گردوں اور جرائم پیشہ عناصر کی سرکوبی اور اہم تنصیبات کی سیکیورٹی کو مؤثر بنانے کے لیے کی گئیں۔ پولیس حکام نے شہریوں سے اپیل کی ہے کہ وہ اپنے اردگرد کے ماحول پر نظر رکھیں اور کسی بھی مشکوک شخص یا سرگرمی کی فوری اطلاع دیں۔
حکام کا کہنا ہے کہ بروقت اطلاع نہ صرف جرائم کی روک تھام میں مددگار ثابت ہوتی ہے بلکہ معاشرے میں امن و امان کے قیام میں بھی اہم کردار ادا کرتی ہے۔ شہری کسی بھی مشتبہ شخص یا غیر قانونی سرگرمی کی اطلاع فوری طور پر قریبی تھانے یا پولیس ہیلپ لائن 15 پر دیں۔
