جہلم: ڈسٹرکٹ پولیس آفیسر (ڈی پی او) جہلم ناصر محمود باجوہ کی ہدایت پر جہلم پولیس نے سال نو کے موقع پر شہریوں کے تحفظ، ہوائی فائرنگ، آتش بازی اور ون ویلنگ کی روک تھام کے لیے مؤثر سکیورٹی پلان مرتب کر لیا۔
ڈی پی او جہلم نے کہا کہ سال نو کے موقع پر شہریوں کی حفاظت کے لیے 400 سے زائد پولیس افسران اور اہلکار اپنے فرائض سر انجام دیں گے۔ شہر بھر میں ون ویلنگ کی روک تھام کے لیے خصوصی پکٹیں قائم کی گئی ہیں جبکہ ہوائی فائرنگ اور آتش بازی کے انسداد کے لیے تمام تھانوں کے علاقوں میں اضافی پکٹس لگائی گئی ہیں۔
ڈی پی او نے واضح کیا کہ ہوائی فائرنگ، آتش بازی، اور ون ویلنگ پر مکمل پابندی عائد ہے، اور قانون کی خلاف ورزی کرنے والوں کے خلاف سخت کارروائی کی جائے گی۔ ہوائی فائرنگ میں ملوث افراد کے خلاف "دہشت گردی کی دفعات” کے تحت مقدمات درج کیے جائیں گے۔ آتش بازی اور ون ویلنگ میں ملوث افراد کو قانونی کارروائی کا سامنا کرنا ہوگا۔
انہوں نے بتایا کہ محافظ اسکواڈ اور تھانوں کی موبائلز مسلسل گشت کریں گی تاکہ شہر میں امن و امان برقرار رکھا جا سکے۔ اس کے علاوہ، مسیحی کمیونٹی کی عبادات کے سلسلے میں بھی موثر سکیورٹی اقدامات کیے گئے ہیں۔
ڈی پی او ناصر محمود باجوہ نے کہا کہ سال نو کی آمد پر فول پروف سکیورٹی انتظامات کو یقینی بنایا جائے گا۔ شہریوں کے جان و مال کے تحفظ اور قانون کی عملداری کو ہر صورت یقینی بنایا جائے گا۔ انہوں نے شہریوں سے اپیل کی کہ وہ قانون نافذ کرنے والے اداروں کے ساتھ تعاون کریں اور کسی بھی مشکوک سرگرمی کی فوری اطلاع قریبی تھانے یا ہیلپ لائن پر دیں۔
