لندن/دینہ: میئر آف سلو بلویندر ڈھلوں نے دینہ کے نواحی علاقے پرانا مہتہ کے رہائشی اور ویکسم کورٹ پیرش کے کونسلر چوہدری مبشر احمد کی رضاکارانہ خدمات کو سراہتے ہوئے انہیں باوقار سرٹیفکیٹ سے نوازا۔
اس موقع پر ایک پروقار تقریب کا انعقاد کیا گیا جس میں میئر بلویندر ڈھلوں نے چوہدری مبشر احمد کو خراجِ تحسین پیش کرتے ہوئے کہا کہ ان کی بے لوث، مسلسل اور مخلصانہ خدمات نے برطانوی معاشرے کی کمزور اور ضرورت مند طبقات کی بھرپور مدد کی ہے۔
میئر سلو کا کہنا تھا کہ چوہدری مبشر احمد کی مختلف تنظیموں کے لیے کی جانے والی رضاکارانہ سرگرمیاں، چاہے وہ ضروری امداد کی فراہمی ہو، مفید مشورے دینا ہو یا اہم معلومات فراہم کرنا اور مؤثر نمائندگی کرنا ہو، ہر پہلو میں ان کی خدمات مثالی ہیں اور ان کی جتنی تعریف کی جائے، کم ہے۔
تقریب سے خطاب کرتے ہوئے چوہدری مبشر احمد نے اس اعزاز کو اپنے والدین، خصوصاً اپنے مرحوم والد چوہدری مشتاق احمد کی دعاؤں کا نتیجہ قرار دیا۔ انہوں نے کہا کہ ان کے والد نے ساری زندگی انسانیت کی خدمت میں گزاری اور آج یہ ایوارڈ ان کے نام سے منسوب ایک خاموش خراج ہے۔ انہوں نے میئر بلویندر ڈھلوں کا شکریہ ادا کرتے ہوئے کہا کہ ان کی طرف سے خدمات کا اعتراف ان کے لیے باعث فخر ہے۔
یاد رہے کہ چوہدری مبشر احمد کا تعلق تحصیل دینہ کے نواحی گاؤں پرانا مہتہ سے ہے اور وہ بیرون ملک برطانیہ میں نہ صرف پاکستانی کمیونٹی کی نمائندگی کر رہے ہیں بلکہ اپنے ملک کا نام بھی فخر سے روشن کر رہے ہیں۔
