جہلم میں چار افراد کو بے دردی سے قتل کرنے والے دو مرکزی ملزمان مبینہ پولیس مقابلے میں مارے گئے۔
تفصیلات کے مطابق جہلم کے علاقے راٹھیاں کے قریب سی سی ڈی ٹیم اور مسلح افراد کے درمیان مبینہ مقابلے میں میاں بیوی اور دو سگے بھائیوں کے قتل میں ملوث دو مرکزی ملزمان مارے گئے۔ ترجمان سی سی ڈی جہلم کے مطابق یہ ملزمان دو روز قبل کوٹھا پرانا میں ایک ہی خاندان کے چار افراد کو بے دردی سے قتل کرنے کے مقدمے میں مطلوب تھے۔
ترجمان کے مطابق راٹھیاں کے قریب ناکہ بندی کے دوران دو موٹرسائیکلوں پر سوار چار مشکوک افراد کو رکنے کا اشارہ کیا تو ملزمان نے سی سی ڈی ٹیم پر فائرنگ کر دی۔ فائرنگ کے تبادلے کے بعد ملزمان موقع سے فرار ہوئے لیکن تھوڑے ہی فاصلے پر دو ملزمان زخمی حالت میں پائے گئے، جنہیں فوری طور پر اسپتال منتقل کیا گیا مگر وہ جانبر نہ ہو سکے۔
@jhelumupdates 💔 جہلم کا سب سے بڑا کرائم کیس! ماں، باپ اور دو بیٹوں کے قتل میں ملوث قاتل مارے گئے 🚨 #JhelumUpdates #LatestNews #fyp #breakingnews #foryoupagе #viralvideos ♬ original sound – Jhelum Updates
ہلاک ہونے والے ملزمان کی شناخت شہروز اور عبداللہ کے ناموں سے ہوئی ہے، جو کوٹھا پرانا میں خاتون سمیت چار افراد کے لرزہ خیز قتل میں مرکزی ملزمان تھے۔ ترجمان نے بتایا کہ دونوں ملزمان اپنے ہی ساتھیوں کی فائرنگ سے ہلاک ہوئے۔
ترجمان سی سی ڈی کا مزید کہنا ہے کہ ملزمان کے قبضے سے خنجر اور ٹوکے برآمد ہوئے ہیں جبکہ فرار ہونے والے دو ملزمان کی تلاش کے لیے سرچ آپریشن جاری ہے۔
ملزم عبداللہ اور شہروز نے دو روز قبل کوٹھا پرانا میں 60 سالہ اشفاق احمد، اس کی اہلیہ رابعہ اور ان کے دو بیٹے بابر اور عرفان کو بے دردی سے ٹوکے اور خنجر مار کر قتل کردیا تھا۔ کالاگجراں پولیس نے مقتول کی بیٹی اور اس کے دوست شہروز سمیت 6 نامز افراد کے خلاف مقدمہ درج کیا تھا۔
پولیس ذرائع کا کہنا ہے کہ شہروز مقتول کی بیٹی عائشہ سے پسند کی شادی کرنا چاہتا تھا لیکن خاندان کی مخالفت کے باعث دونوں گھر سے بھاگ گئے تھے۔ بعدازاں پنچایت کے ذریعے عائشہ کو واپس گھر لایا گیا جس پر شہروز کو شدید رنج تھا۔
