پیرس: پاکستان بزنس فورم فرانس کے سرپرست اعلیٰ معروف کاروباری شخصیت ابراہیم ڈار کی طرف سے عوام پاکستان پارٹی کے کنوینر سابق وزیراعظم شاہد خاقان عباسی کے اعزاز میں فرانس کے شہر سارسل کے ایک مقامی ریسٹورنٹ میں عشائیہ دیا گیا ۔
سابق وزیر اعظم شاہد خاقان عباسی نے فرانس بزنس کمیونٹی سے خطاب میں کہا کہ پاکستان کو معاشی طور پر مضبوط کرنے کے لیے ضروری ہے کہ ملک کے اندر جو تفریق ہے اس کو ختم کیا جائے۔ ہم نے اپنی تاریخ مسخ کردی ہے، تاریخ میں ایسا پہلی بار ہوا کہ اکثریت ہم سے علیحدہ ہوئی نا کہ اقلیت۔
انہوں نے کہا کہ آج ملک کے حالات ہر حوالے سے خراب ہیں اور خراب تر ہوتے جارہے ہیں اور نہ ہی کوئی امید نظر آ رہی ہے۔ سیاستدانوں کی ذمہ داری ہے کہ ٹیکس ادا کریں کیونکہ وہ عوام پر ٹیکس لگاتے ہیں، اسمبلیوں میں بیٹھے لوگ دھڑلے سے ٹیکس ادا نہیں کرتے، تمام آئینی عہدے دار ہر روز آئین توڑتے ہیں۔
شاہد خاقان عباسی نے کہا کہ 77 سال میں ایک الیکشن بھی غیر متنازعہ نہیں ہوا اور نہ ہی عوام کی رائے کا احترام کیا گیا۔ ن لیگ کی حکومت میں ہر اچھے برے فیصلے کا حصہ دار ہوں ۔ ہمارے ملک میں سیاستدانوں کا احتساب کرنے کے لئے نیب کا ادارہ بنایا گیا ہےلیکن اس ادارے کی وجہ سے آج کوئی بیوروکریٹ کام کرنے کو تیار نہیں کہ کل کو مجھے نیب کو بھگتنا پڑے گا۔
انہوں نے کہا کہ فوج نے ملک پر 32 سال حکومت کی ہے اور باقی کے سال بالواسطہ حکومت کی ہے، عدلیہ بھی اب اس کا حصہ بن چکی ہے، دنیا کا کوئی ملک ایسے نہیں چل سکتا۔ ملک میں سیاست کا کردار ختم ہو چکا ہے، لکھ پتی سیاست میں آنے کے اب ارب پتی ہوچکے ہیں، سیاست پیشہ نہیں ہے بلکہ رضاکارانہ ذمہ داری ہے،سیاست ایک کمٹمنٹ ہے۔
سابق وزیراعظم نے کہا کہ سیاستدان میں تین وصف ہونے چاہئے، ڈگری نہیں تعلیم چاہئے، زندگی کا تجربہ چاہئے ، کوئی کاروبار یا کوئی نوکری کی ہو، سیاسی نظام کے بارے آگاہی ہو، دنیا کے بارے آگاہی ہو۔ ہمارے وزراء کو علم ہی نہیں کہ ملک کو آگے لے جانے کے لئے ہمیں کیا چاہئے۔
انہوں نے کہا کہ صرف تین الیکشن فری اینڈ فئیر کروادیں آپ کا ملک ٹھیک ہوجائے گا۔ عوام کی فلاح معیشت سے ہوگی، کمزور معیشت سے ملک آگے نہیں جا سکتا،ہمارے ملک کی معیشت اپنے قرضوں کا سود ادا نہیں کرسکتی لیکن ہمارے حکمرانوں کو اس کی پروا ہی نہیں ہے۔ بجلی کے بلوں میں اضافہ معیشت کی ناکامی ہے، حکمرانوں کی ناکامی ہے،ہمارے نظام کی ناکامی ہے۔
سابق وزیراعظم شاہد خاقان عباسی نے کہا کہ ہمارے سیاستدانوں کا مطمع نظر صرف اور صرف کرسی ہے، ہم نے انتشار کو بڑھاوا دیا ہے۔آج سب کو پاکستان کی حقیقت ٹی وی یا اخبارات میں جو کچھ دیکھائی جاتی ہے وہ بالکل مختلف ہے اور میں نے کبھی پاکستانی نیوز پڑھی نا دیکھی۔
تقریب کےآخر میں پاکستان بزنس فورم کے سرپرست ابراہیم ڈار نے شاہد خاقان عباسی، بزنس کمیونٹی اور صحافی برادری کا شکریہ ادا کیا کہ وہ اپنی مصروفیات چھوڑ کر ان کی دعوت پر تشریف لائے۔ تقریب میں سوال و جواب کا سیشن بھی ہوا جس سے فرانس بزنس کمیونٹی کے ممبر مطمئن نظر آئے۔
