دینہ پولیس نے جوئے کی بازی الٹ دی، 6 قماربازوں کو رنگے ہاتھوں گرفتار کر کے داؤ پر لگی نقدی، موبائل فونز اور آلات برآمد کر لئے گئے۔
تفصیلات کے مطابق جہلم کی تحصیل دینہ میں ایس ایچ او تھانہ دینہ سرمد ملک اور ان کی ٹیم قمار بازی کے خلاف اہم کارروائی کرتے ہوئے مرغوں کی لڑائی پر جُوا کھیلنے میں ملوث 6 ملزمان کو گرفتار کر لیا۔
پولیس نے کارروائی کے دوران ملزمان کے قبضے سے داؤں پر لگی رقم 1 لاکھ 25 ہزار روپے، 8 عدد موبائل فونز اور قمار بازی میں استعمال ہونے والے آلات برآمد کر لیے۔
پولیس کے مطابق ملزمان مرغوں کی لڑائی پر جُوا کھیل کر قانون کی خلاف ورزی کے مرتکب ہوئے، جس پر فوری کارروائی کرتے ہوئے مقدمہ درج کیا گیا۔
اس موقع پر ڈسٹرکٹ پولیس آفیسر جہلم طارق عزیز سندھو نے کہا کہ قمار بازی معاشرتی برائیوں اور جرائم کی جڑ ہے، جس کے خلاف زیرو ٹالرنس پالیسی کے تحت کارروائیاں جاری رہیں گی۔
انہوں نے واضح کیا کہ ایسے جرائم میں ملوث عناصر کو کسی صورت رعایت نہیں دی جائے گی اور ضلع بھر میں قانون کی عملداری کو یقینی بنایا جائے گا۔
