دینہ: راجہ علی نے کہا ہے کہ دینہ اور سوہاوہ کی تعمیر و ترقی، عوامی فلاح و بہبود اور معیاری ترقیاتی منصوبوں کی تکمیل کے لیے وزیرِ مملکت بلال اظہر کیانی کی خصوصی دلچسپی اور وژن قابلِ ستائش ہے۔ ان کا کہنا تھا کہ عوام کا اعتماد، محبت اور دعائیں ہی ہماری اصل طاقت ہیں اور یہی جذبہ ہمیں عوامی خدمت کے لیے مزید متحرک رکھتا ہے۔
میڈیا سے گفتگو کرتے ہوئے وزیرِ مملکت برائے خزانہ و ریلوے بلال اظہر کیانی کے کوآرڈینیٹر راجہ علی نے کہا کہ اگر اللہ تعالیٰ نے ہمیں عزت اور مقام عطا کیا ہے تو وہ عوام کی حمایت، اعتماد اور دعاؤں کی بدولت ہے۔ انہوں نے کہا کہ عوامی خدمت ہمارا مشن ہے اور علاقے کی ترقی کے لیے تمام تر صلاحیتیں اور وسائل بروئے کار لائے جا رہے ہیں۔
انہوں نے واضح کیا کہ ترقیاتی منصوبوں میں کسی قسم کی بے ضابطگی، کرپشن، غفلت یا ناقص میٹریل کے استعمال کو ہرگز برداشت نہیں کیا جائے گا۔ عوامی وسائل قوم کی امانت ہیں اور ان کے درست استعمال کو یقینی بنانا ہماری ذمہ داری ہے۔
راجہ علی نے مزید کہا کہ بلال اظہر کیانی نے ہمیشہ دیانتداری، شفافیت اور عوامی خدمت کا درس دیا ہے، اسی سوچ کے تحت تمام ترقیاتی منصوبوں میں معیار اور شفافیت کو اولین ترجیح دی جا رہی ہے۔ انہوں نے کہا کہ جو بھی ٹھیکیدار یا متعلقہ فرد ناقص میٹریل استعمال کرے گا یا عوامی وسائل میں خیانت کا مرتکب پایا گیا تو اس کے خلاف سخت قانونی کارروائی عمل میں لائی جائے گی۔
انہوں نے اس عزم کا اظہار کیا کہ دینہ اور سوہاوہ کے عوام کو حقیقی معنوں میں ترقی کے ثمرات پہنچانے کے لیے معیاری منصوبوں کی بروقت تکمیل کو یقینی بنایا جائے گا۔ ان کا کہنا تھا کہ سڑکوں، بنیادی سہولیات، عوامی فلاحی منصوبوں اور دیگر ترقیاتی اقدامات کے ذریعے علاقے کی محرومیوں کا خاتمہ اور عوام کے معیارِ زندگی میں بہتری لانا حکومت کی ترجیحات میں شامل ہے۔
راجہ علی نے کہا کہ عوامی اعتماد پر پورا اترنے کے لیے شفاف طرزِ حکمرانی، مؤثر نگرانی اور میرٹ کی پالیسی پر عمل جاری رکھا جائے گا تاکہ دینہ اور سوہاوہ ترقی اور خوشحالی کی نئی منازل طے کر سکیں۔
