پنڈدادنخان میں ظلم کی انتہا، مخالفین نے معمولی تلخ کلامی پر زہریلی سپرے کر کے محنت کش کی 9 کنال رقبہ پر کاشت باجرہ کی فصل تباہ کر دی۔
تفصیلات کے مطابق جہلم کی تحصیل پنڈدادنخان کے نواحی گاؤں سگھر پور میں محنت کش محمد اختر نے 9 کنال رقبہ ٹھیکہ پر لے کر باجرے کی فصل کاشت کر رکھی تھی جس پر مخالفین نے رات کی تاریکی میں زہریلی سپرے کر کے ساری فصل تباہ کر دی۔
متاثرہ محنت کش محمد اختر سکنہ بھابھانوالہ کا کہنا تھا کہ مجھے علی الصبح اطلاح ملی کہ تمہاری باجرے کی فصل تو ختم ہو چکی ہے تاہم میں نے آس پاس کے ڈیرہ جات سے باز پُرس کی تو پتا چلا کہ سگھرپور کے رہائشی ہمایوں ولد امجد، جاوید ولد عنائیت گزشتہ رات میری فصل پر سپرے کرتے رہے تھے۔
متاثرہ محنت کش کا کہنا ہے کہ اس بارے ہمایوں اور جاوید سے بات کی تو انہوں نے دھمکی دیتے ہوئے کہا کہ ابھی تو فصل ختم کی ہے اگر تم جگہ کی طرف گئے تو تم بھی نہیں بچو گے تاہم میں نے تھانہ جلالپورشریف میں تحریری درخواست دے دی ہے۔
ایس ایچ او تھانہ جلالپورشریف نے محنت کش کو داد رسی کی یقین دہانی کرواتے ہوئے باضابطہ کارروائی شروع کردی ہے۔
انہوں نے ڈی پی او جہلم ناصر محمود باجوہ سے اپیل کی ہے کہ ملزمان کے خلاف کارروائی عمل میں لا کر مجھے تحفظ فراہم کیا جائے۔
