جہلم: ڈپٹی کمشنر جہلم میثم عباس نے کہا ہے کہ سرکاری سکولوں میں زیادہ سے زیادہ طلبہ کے داخلے کو یقینی بنانے کے لیے مربوط مہم چلائی جائے تاکہ بچوں کو اعلیٰ معیار کی مفت تعلیم میسر آ سکے۔
یہ بات انہوں نے گورنمنٹ تبلیغ الاسلام ہائی سکول میں جاری داخلہ مہم کا جائزہ لیتے ہوئے کہی۔ اس موقع پر سکول کے پرنسپل نے ڈپٹی کمشنر کو نئے داخلوں سے متعلق کیے گئے اقدامات پر تفصیلی بریفنگ دی۔
ڈپٹی کمشنر میثم عباس نے داخلے کے لیے آنے والے طلبہ اور ان کے والدین سے بھی ملاقات کی اور کہا کہ "سرکاری سکولوں میں تمام بنیادی سہولیات موجود ہیں اور یہاں بہترین کوالیفائیڈ اساتذہ بچوں کو معیاری تعلیم فراہم کر رہے ہیں۔ والدین کو چاہیے کہ وہ اپنے بچوں کے روشن مستقبل کے لیے انہیں قریبی سرکاری تعلیمی اداروں میں داخل کروائیں۔”
انہوں نے مزید کہا کہ سرکاری اداروں میں تعلیم مکمل طور پر مفت ہے اور حکومت پنجاب تعلیم کے فروغ کے لیے بھرپور اقدامات کر رہی ہے۔
