پائلٹ ہی اپنا پاسپورٹ لے جانا بھول گیا، مسافروں سے بھری طویل پرواز واپس لانی پڑ گئی

امریکہ سے چین جانے والی یونائیٹڈ ایئرلائنز کی ایک پرواز کو اس وقت غیر متوقع طور پر راستہ بدلنا پڑا جب دورانِ پرواز پائلٹ کو احساس ہوا کہ وہ اپنا پاسپورٹ ساتھ لانا بھول گئے ہیں۔

یہ واقعہ 22 مارچ کو پیش آیا جب یونائیٹڈ فلائٹ 198 دوپہر 2 بجے لاس اینجلس انٹرنیشنل ایئرپورٹ سے شنگھائی کے لیے روانہ ہوئی۔ تاہم، پرواز کے دو گھنٹے بعد، طیارے نے اچانک یوٹرن لیا اور شام 5 بجے سان فرانسسکو انٹرنیشنل ایئرپورٹ پر لینڈ کر گیا۔

یونائیٹڈ ایئرلائنز نے اپنے بیان میں تصدیق کی کہ پرواز کو سان فرانسسکو موڑنے کی وجہ پائلٹ کا پاسپورٹ نہ ہونا تھا۔

ایئرلائن نے فوری طور پر نیا عملہ ترتیب دیا، جس کے بعد سان فرانسسکو سے رات 9 بجے ایک نئی پرواز شنگھائی کے لیے روانہ ہوئی، جو 12 گھنٹے کے سفر کے بعد مقامی وقت کے مطابق صبح 1 بجے منزل پر پہنچی۔

ایئرلائن نے معذرت کا اظہار کرتے ہوئے کہا، ’ہم نے اپنے مسافروں کے لیے ایک نئے عملے کا انتظام کیا اور انہیں اسی رات اپنی منزل کی جانب روانہ کیا۔ تمام مسافروں کو کھانے کے واؤچرز اور اضافی معاوضہ دیا گیا۔‘

خبر کے مطابق، دورانِ پرواز مسافروں کو پیغام بھیجا گیا جس میں کہا گیا، ’آپ کی پرواز کو عملے سے متعلق ایک غیر متوقع مسئلے کی وجہ سے سان فرانسسکو موڑا گیا ہے۔ نیا عملہ پہنچنے کے بعد، ہم جلد از جلد آپ کو دوبارہ شنگھائی روانہ کریں گے۔ ہمیں اس پریشانی پر دلی افسوس ہے اور آپ کے صبر کی قدر کرتے ہیں۔‘

سان فرانسسکو میں لینڈنگ کے بعد، مسافروں کو 15 ڈالر مالیت کے کھانے کے واؤچرز فراہم کیے گئے۔