جہلم: ڈپٹی کمشنر جہلم میر رضا اوزگن کی خصوصی ہدایات کی روشنی میں ایڈیشنل ڈپٹی کمشنر جنرل شگفتہ جبین کی زیر صدارت ضلعی پرائس کنٹرول کمیٹی کا اہم اجلاس منعقد ہوا۔
اجلاس میں تمام پرائس کنٹرول مجسٹریٹس، اسسٹنٹ کمشنرز اور ڈی او انڈسٹریز نے شرکت کی، جس میں ضلع بھر میں اشیائے خوردونوش کی قیمتوں کے استحکام اور سپلائی چین کی صورتحال کا تفصیلی جائزہ لیا گیا۔
اجلاس سے خطاب کرتے ہوئے ایڈیشنل ڈپٹی کمشنر جنرل شگفتہ جبین نے کہا کہ وزیراعلیٰ پنجاب کے عوامی فلاحی ایجنڈے کے مطابق عام آدمی کو ریلیف کی فراہمی ضلعی انتظامیہ کی اولین ترجیح ہے۔ انہوں نے تمام پرائس کنٹرول مجسٹریٹس کو سخت ہدایت کی کہ وہ فیلڈ میں اپنی موجودگی کو ہر صورت یقینی بنائیں اور اس بات کی کڑی نگرانی کریں کہ کوئی بھی دکاندار سرکاری نرخ نامے کی خلاف ورزی کرتے ہوئے عوام کو گراں فروشی کا نشانہ نہ بنائے۔
شگفتہ جبین نے مزید کہا کہ ذخیرہ اندوزی اور گراں فروشی کرنے والے عناصر کسی رعایت کے مستحق نہیں ہیں اور ان کے خلاف زیرو ٹولرنس کی پالیسی اپنائی جائے گی۔ انہوں نے واضح کیا کہ بازاروں میں ریٹ لسٹوں کی نمایاں جگہ پر موجودگی کو ہر صورت یقینی بنایا جائے اور خلاف ورزی کرنے والوں کے خلاف موقع پر ہی بھاری جرمانے عائد کرنے کے ساتھ ساتھ قانونی کارروائی اور گرفتاریاں بھی عمل میں لائی جائیں تاکہ مصنوعی مہنگائی کا مکمل خاتمہ ممکن ہو سکے۔
اجلاس کے اختتام پر انہوں نے تمام متعلقہ افسران کو پابند کیا کہ وہ روزانہ کی بنیاد پر اپنی کارروائیوں کی رپورٹ ڈپٹی کمشنر آفس میں جمع کرائیں۔ انہوں نے کہا کہ آٹا، چینی، گھی، دالوں اور سبزیوں جیسی بنیادی اشیاء کی مقررہ قیمتوں پر دستیابی میں کسی قسم کا تعطل برداشت نہیں کیا جائے گا اور انتظامیہ مارکیٹ کے حالات کی مسلسل مانیٹرنگ جاری رکھے گی تاکہ شہریوں کو حقیقی معنوں میں ریلیف فراہم کیا جا سکے۔
