جہلم سبزی منڈی میں انتظامیہ کی عدم موجودگی اور غفلت کے باعث بولی کا نظام مکمل طور پر مفلوج ہو کر رہ گیا ہے، جس کے نتیجے میں آڑھتیوں نے اپنی من مرضی کے نرخ مقرر کر لیے ہیں۔
سبزی منڈی میں روزانہ کی بنیاد پر بولی نہ ہونے کی وجہ سے سبزیوں اور پھلوں کی قیمتوں میں بے پناہ اضافہ دیکھنے میں آ رہا ہے۔ منڈی میں اس وقت کسی قسم کی سرکاری نگرانی یا چیک اینڈ بیلنس موجود نہیں، جس کا براہِ راست اثر شہریوں کی جیبوں پر پڑ رہا ہے۔
خریداروں کا کہنا ہے کہ اشیائے خوردونوش کی قیمتیں اب منڈی کے اصولوں کے بجائے آڑھتیوں کے “موڈ” کے مطابق طے ہوتی ہیں، جبکہ کوئی افسر ان سے بازپرس کرنے والا نہیں۔
شہریوں نے ڈپٹی کمشنر جہلم میر رضا اوزگن سے مطالبہ کیا ہے کہ سبزی منڈی میں روزانہ بولی کے وقت سرکاری افسران کی موجودگی کو یقینی بنایا جائے اور ناجائز منافع خوروں کے خلاف سخت کارروائی کی جائے تاکہ مہنگائی کے بوجھ میں کمی لائی جا سکے۔
