جہلم میں پولیس نے مویشی چوری کی وارداتوں میں مبینہ طور پر ملوث سبی گینگ کے سرغنہ کو ساتھیوں سمیت گرفتار کر لیا۔
ترجمان جہلم پولیس کے مطابق ایس ایچ او تھانہ چوٹالہ سرمد ملک اور پولیس ٹیم نے کارروائی کرتے ہوئے مویشی چوری کی وارداتوں میں مبینہ طور پر متحرک سبی گینگ کے سرغنہ سمیت تین ملزمان کو گرفتار کر لیا۔
پولیس ترجمان کے مطابق گرفتار ملزمان کے قبضے سے چوری شدہ مویشی فروخت کرکے حاصل کی گئی ایک لاکھ 94 ہزار روپے کی نقدی بھی برآمد کرلی گئی ہے۔
پولیس حکام کا کہنا ہے کہ گرفتار ملزمان کے خلاف ٹھوس شواہد اکٹھے کیے جا رہے ہیں اور انہیں مکمل شواہد کے ساتھ چالان کرکے عدالت میں پیش کیا جائے گا، جہاں قانون کے مطابق انہیں قرار واقعی سزا دلوانے کے لیے پیروی کی جائے گی۔
ڈی پی او جہلم شفیق احمد چوہدری نے کہا کہ جرائم پیشہ عناصر کے خلاف بلاامتیاز کارروائیاں جاری رہیں گی اور عوام کے جان و مال کے تحفظ کو ہر صورت یقینی بنایا جائے گا۔
