دینہ کے نواحی علاقہ میں بھائی نے بھائی کو زنجیروں سے باندھ کر مویشیوں کے باڑے میں قید کر لیا، پولیس نے متاثرہ شخص کو بازیاب کروا لیا۔
تفصیلات کے مطابق ڈسٹرکٹ پولیس آفیسر (ڈی پی او) جہلم شفیق احمد چوہدری کی ہدایت پر جہلم کی تحصیل دینہ کے علاقے ساگری میں تھانہ منگلا کینٹ پولیس نے فوری کارروائی کرتے ہوئے اپنے سگے بھائی کو مبینہ طور پر زنجیروں میں جکڑ کر قید رکھنے والے ملزم کو گرفتار کر لیا، جبکہ متاثرہ شخص کو بحفاظت بازیاب کرا لیا گیا۔
ترجمان جہلم پولیس کے مطابق سوشل میڈیا پر واقعے کی ویڈیو وائرل ہونے کے بعد ڈی پی او جہلم نے فوری نوٹس لیتے ہوئے ایس ایچ او تھانہ منگلا کینٹ کو کارروائی کی ہدایت جاری کی۔ پولیس ٹیم اطلاع ملتے ہی موقع پر پہنچی، جہاں ایک شخص کو زنجیروں سے باندھ کر جانوروں کے باڑے میں رکھا گیا تھا۔
پولیس نے متاثرہ شخص کو زنجیروں سے آزاد کروا کر محفوظ مقام پر منتقل کیا اور ملزم شبیر احمد کو موقع سے گرفتار کر لیا۔ پولیس کے مطابق واقعے کا مقدمہ سرکاری مدعیت میں درج کر لیا گیا ہے جبکہ مزید تفتیش جاری ہے۔
ابتدائی معلومات کے مطابق ملزم پر الزام ہے کہ اس نے اپنے سگے بھائی کو مبینہ طور پر جائیداد ہتھیانے کی غرض سے تقریباً تین ماہ تک قید رکھا۔ تاہم ملزم نے پولیس کو اپنے ابتدائی بیان میں مؤقف اختیار کیا کہ اس کا بھائی گھر میں لڑائی جھگڑا کرتا تھا، اس لیے اسے علیحدہ رکھا گیا تھا۔ پولیس کا کہنا ہے کہ واقعے کے تمام پہلوؤں کی غیر جانبدارانہ تحقیقات جاری ہیں۔
ڈی پی او جہلم شفیق احمد چوہدری نے کہا کہ ملزم کو ٹھوس شواہد کے ساتھ عدالت میں پیش کر کے قرار واقعی سزا دلوائی جائے گی۔ انہوں نے واضح کیا کہ کسی بھی شہری کے ساتھ غیر انسانی، غیر قانونی یا توہین آمیز سلوک ہرگز برداشت نہیں کیا جائے گا اور قانون کی خلاف ورزی کرنے والوں کے خلاف بلاامتیاز کارروائی جاری رہے گی۔
