تجربہ کار پائلٹس ہوائی جہاز کو اڑانے اور اتارنے کا بخوبی اندازہ رکھتے ہیں، وہ دنیا بھر کے ممالک کے سفر پر کئی مسافروں کے ساتھ جاتے ہیں اور مختلف ملکوں کے ائیرپورٹس پر طیارے کی اڑان بھرنے اور لینڈنگ میں مہارت رکھتے ہیں۔
مگر دنیا میں ایک ایسا ایئر پورٹ بھی ہے جہاں ہوائی جہاز اتارنا پر پائلٹ کے بس کی بات نہیں۔
میڈیا رپورٹس کے مطابق بھوٹان کا پیرو انٹرنیشنل ایئر پورٹ ہمالیہ کے درمیان واقع ہے جہاں پر مسافر طیارے کی لینڈنگ تکنیکی اعتبار سے دنیا میں سب سے مشکل سمجھی جاتی ہے۔
چین اور بھارت کے درمیان واقع بھوٹان 97 فیصد پہاڑوں سے گھرا ہوا ہے، اس کا دارالحکومت تھمپو سطح سمندر سے 7 ہزار 710 فٹ (2,350 میٹر) بلندی پر ہے، تاہم پیرو ایئر پورٹ کا علاقہ قدرے نیچے ہے، جوکہ 7 ہزار 382 فٹ پر ہے۔
پائلٹس کو رن وے تک پہنچنے کے لیے انتہائی اونچے پہاڑوں سے گزرنا پڑتا ہے، جس سے لینڈنگ دشوار ہوجاتی ہے۔ دنیا بھر میں صرف 50 خصوصی تربیت یافتہ پائلٹس ایسے ہیں جو پیرو ایئر پورٹ پر پرواز اتارنے اور اڑانے میں مہارت رکھتے ہیں۔
ڈرک ایئر کے کیپٹن چیمی دورجی نے کہا کہ پیرو ایئر پورٹ پر پرواز کے لیے پائلٹس کو مقامی معلومات اور خصوصی تربیت کی ضرورت ہوتی ہے۔
اس کے علاوہ بھوٹان کا غیر متوقع موسم پیرو ہوائی اڈے میں پرواز کو اور بھی مشکل بنا دیتا ہے۔ پائلٹ عام طور پر دوپہر کے وقت پرواز کرنے سے گریز کرتے ہیں جب ہوائیں تیز چلتی ہیں تو لینڈنگ کو مشکل بنا دیتی ہیں۔
