جہلم شہر اور گردونواح میں سڑکوں پر گزرنے والی مٹی، ریت اور خاکہ سے لدی ٹریکٹر ٹرالیاں شہریوں کے لیے ایک عذاب کی شکل اختیار کر چکی ہیں۔ دورانِ ٹریفک ان ٹرالیوں سے اڑنے والی گرد و غبار اور مٹی نے شہریوں کا جینا دوبھر کر دیا ہے۔
شہریوں نے شکایت کی ہے کہ سڑکوں پر دن بھر دھول اڑنے سے سانس لینے میں دشواری، دمہ، آشوب چشم اور دیگر امراض میں اضافہ ہو رہا ہے۔ خاص طور پر اسکول کے بچے، بزرگ شہری اور موٹر سائیکل سوار زیادہ متاثر ہو رہے ہیں۔
پنجاب حکومت کی جانب سے واضح احکامات جاری کیے گئے ہیں کہ مٹی، ریت یا ملبہ سے لدی ٹریکٹر ٹرالیاں بغیر ڈھانپے (کور کے بغیر) سڑکوں پر نہیں چلائی جا سکتیں۔ تاہم جہلم شہر اور اس سے ملحقہ علاقوں میں ڈرائیور حضرات نے حکومتی احکامات کو ہوا میں اڑا دیا ہے۔
روزانہ شہر کی اہم شاہراہوں، جی ٹی روڈ، سول لائن اور ریلوے روڈ سمیت دیگر مقامات پر ان ٹرالیوں کی آمدورفت سے شدید دھول آلود فضا پیدا ہو جاتی ہے جس سے شہریوں کو نہ صرف آمدورفت میں مشکلات پیش آتی ہیں بلکہ فضا میں آلودگی کا تناسب بھی خطرناک حد تک بڑھ گیا ہے۔
شہریوں کا کہنا ہے کہ ٹریفک پولیس کی جانب سے ایسے عناصر کے خلاف کسی قسم کی کارروائی عمل میں نہیں لائی جا رہی جو کہ قانون پر عملدرآمد کے حوالے سے ایک سوالیہ نشان ہے۔
شہریوں نے ڈی پی او جہلم اور ضلعی انتظامیہ سے اپیل کی ہے کہ وہ فوری طور پر نوٹس لیں اور ان لوڈ ٹریکٹر ٹرالیوں کے خلاف مؤثر کارروائی کریں تاکہ شہریوں کو اس اذیت ناک صورتحال سے نجات مل سکے۔
