ایمریٹس ایئرلائن کا 5 ہزار نئی بھرتیوں کا اعلان

دبئی: متحدہ عرب امارات کی ریاست دبئی سے تعلق رکھنے والی دنیا کی معروف فضائی کمپنی ایمریٹس ایئرلائن نے 5 ہزار نئی بھرتیوں کا اعلان کردیا۔

گلف نیوز کے مطابق ایمریٹس ایئرلائن اپنے آنے والے طیاروں A350s کے لیے 2024ء میں 5 ہزار اضافی کیبن کریو بھرتی کرے گی، نئے ملازمین کی تلاش میں دبئی کی فضائی کمپنی 460 شہروں میں بھرتی مہم شروع کرے گی، اس مہم کو بنیادی طور پر ان لوگوں کے لیے ڈیزائن کیا گیا ہے جو جلد ہی پروفیشنل لائف کا حصہ بننا چاہتے ہیں یا حال ہی میں اپنے کریئر کی دنیا میں قدم رکھ چکے ہیں۔

بتایا گیا ہے کہ ایئر لائن ایسے نئے گریجویٹسں کو مدعو کررہی ہےجان کے سی وی پر انٹرنشپ یا پارٹ ٹائم ملازمت کے بارے میں درج ہو، کمپنی ایسے لوگوں کی تلاش میں ہے جو ایک سال یا اس سے زیادہ مہمان نوازی یا کسٹمر سروس کا تجربہ رکھتے ہیں اور ‘دنیا کا سفر’ کے کریئر کی شروعات کرنے کے خواہشمند ہیں۔

ایمریٹس نے ایک بیان میں کہا کہ نئے بھرتی ہونے والے افراد دنیا کی سب سے بڑی بین الاقوامی ایئر لائن کا حصہ ہوں گے اور سب سے مشہور برانڈز میں سے ایک ہوں گے، نیز وہ بہترین ٹرینرز سے مہمان نوازی اور زندگی کی مہارتیں سیکھیں گے، وہ 76 ممالک کے 140 سے زیادہ شہروں میں دنیا کا سفر کریں گے اور ایمریٹس کے کیبن کریو کے طور پر کام کرنے والے تمام فوائد سے لطف اندوز ہوں گے، جس کے لیے تمام کیبن کریو ریکروٹس دبئی میں ایمریٹس کی سہولت میں آٹھ ہفتوں کی تربیت سے گزریں گے۔

معلوم ہوا ہے کہ اس سال ایمریٹس کی ریکروٹمنٹ ٹیم دنیا بھر کے 460 سے زیادہ شہروں میں بھرتی مہم چلائے گی، جو ایئر لائن کے نیٹ ورک کے دورانیے اور اس کے کیبن کریو ٹیم کے تنوع کی عکاسی کرتی ہے جب کہ 2023ء میں ایمریٹس نے 353 شہروں میں بھرتی کے پروگرام منعقد کرنے کے بعد 8 ہزار بھرتی کیے گئے کیبن کریو کی خدمات حاصل کیں، جس کے نتیجے میں اگست 2023ء میں ایئر لائن کے کیبن کریو کی تعداد 20 ہزار سے تجاوز کر گئی اور اب ان کی تعداد 21 ہزار 500 ہے۔

ایئر لائن نے کہا ہے کہ ہم ایک کثیر الثقافتی ٹیم میں مؤثر طریقے سے کام کرنے کی صلاحیت پیدا کررہے ہیں، ایمریٹس میں دباؤ کے دوران ذہنی طور پر مضبوط اور پرسکون رہنے پر توجہ مرکوز کی جاتی ہے، جس کی بدولت ایمریٹس کی ٹیم کا حصہ بننے والے مہمان نوازی اور غیر معمولی خدمات میں نمایاں مقام حاصل کرکے ایک مشہور برانڈ کے سفیر بنتے ہیں۔

یہ بھی پڑھنا مت بھولیں

جواب دیں

آپ کا ای میل ایڈریس شائع نہیں کیا جائے گا۔ ضروری خانوں کو * سے نشان زد کیا گیا ہے

Back to top button