جہلم/ پنڈدادنخان: وزیر مملکت بلال اظہر کیانی کی دولت پور میں شہید کیپٹن حسنین اختر کے گھر پہنچ گئے۔ انہوں نے شہید کی قبر پر فاتحہ خوانی کی اور پھولوں کی چادر چڑھائی۔
تفصیلات کے مطابق وزیر مملکت برائے ریلوے بلال اظہر کیانی عیدالفطر کے روز جہلم کی تحصیل پنڈ دادنخان کے گاؤں دولت پور پہنچے، جہاں انہوں نے شہید کیپٹن حسنین اختر کے گھر جا کر اہلِ خانہ سے ملاقات کی اور شہید کو زبردست خراجِ تحسین پیش کیا۔
وزیر مملکت نے شہید کی آخری آرام گاہ پر فاتحہ خوانی کی اور پھولوں کی چادر چڑھائی۔ اس موقع پر انہوں نے کہا کہ "شہداء ہمارا فخر ہیں، ان کی قربانیاں کبھی فراموش نہیں کی جا سکتیں۔” انہوں نے شہید کے اہل خانہ کے حوصلے کو سراہتے ہوئے ان کے ساتھ وقت گزارا اور شہید کے درجات کی بلندی کے لیے دعا کی۔
واضح رہے کہ کیپٹن حسنین اختر 20 مارچ 2025 کو خیبر پختونخوا کے ضلع ڈیرہ اسماعیل خان میں دہشت گردوں کے خلاف بہادری سے لڑتے ہوئے شہادت کے رتبے پر فائز ہوئے تھے۔
