جہلم: پولیس نے کارروائی کرتے ہوئے پیشہ ور بھکاری خاتون کو گرفتار کر لیا۔
تفصیلات کے مطابق جہلم میں ایس ایچ او تھانہ سٹی اور ان کی ٹیم نے پیشہ ور بھکاریوں کے خلاف جاری مہم کے دوران ایک اور اہم کارروائی کرتے ہوئے پیشہ ور بھکاری خاتون کو گرفتار کر لیا، جس کے خلاف تھانہ سٹی میں باقاعدہ مقدمہ درج کر لیا گیا ہے۔
پولیس کے مطابق پیشہ ور بھکاری مختلف شاہراہوں، چوک چوراہوں اور مصروف مقامات پر کھڑے ہو کر نہ صرف ٹریفک کی روانی میں خلل ڈالتے ہیں بلکہ حادثات کا بھی باعث بنتے ہیں، جس سے شہریوں کی جان و مال کو خطرات لاحق ہو سکتے ہیں۔
اس حوالے سے طارق عزیز سندھو نے کہا کہ پیشہ ور بھکاریوں کے خلاف بلاامتیاز کارروائیاں جاری رہیں گی تاکہ شہریوں کو محفوظ اور پرامن ماحول فراہم کیا جا سکے۔ انہوں نے شہریوں سے اپیل کی کہ پیشہ ور بھکاریوں کی حوصلہ شکنی کریں اور ایسے عناصر کو پیسے دینے کے بجائے متعلقہ اداروں کو اطلاع دیں، تاکہ اس سماجی برائی کا مؤثر خاتمہ ممکن بنایا جا سکے۔
