جی ٹی اے 6 کی دنیا بھر میں دھوم، ٹریلر 11 کروڑ سے زیادہ مرتبہ دیکھا جا چکا

مشہور ویڈیو گیم ’گرینڈ تھیفٹ آٹو 6‘ (جی ٹی اے 6) کا ٹریلر ریلیز کردیا گیا ہے، گیم ڈویپلر راک اسٹار نے اس گیم کا ٹریلر 5 دسمبر کو پاکستانی وقت کے مطابق شام 7 بجے ریلیز کرنا تھا، مگر آن لائن لیک ہو جانے کی وجہ سے انہیں ٹریلر کو 15 گھنٹے پہلے ہی ریلیز کرنا پڑا۔

راک اسٹار گیمز نے 4 دسمبر کو ایکس پر اپنی ایک پوسٹ میں کہا، ’ ہمارا جی ٹی اے 6 کا ٹریلر لیک ہو چکا ہے لہٰذا ہمارے یوٹیوب پر جاکر اصل ٹریلر دیکھیں۔‘

91 سیکنڈز کا جی ٹی اے 6 کا ٹریلر اس وقت یوٹیوب پر سب سے زیادہ دیکھی جانے والی نان میوزک ویڈیو بن چکا ہے، اس سے قبل یہ ریکارڈ مسٹر بیسٹ کی ویڈیو نے بنایا تھا۔

دنیا بھر میں گیمرز کئی سال سے جی ٹی اے 6 کا بے صبری سے انتظار کر رہے ہیں۔ اس سیریز کا اس سے قبل ریلیز ہونے والا چیپٹر جی ٹی اے 5 تھا جو 2013 میں لانچ کیا گیا تھا۔ جی ٹی اے 5 کی دنیا بھر میں 190 ملین کاپیاں فروخت ہوئی تھیں جو کہ مائیکروسافٹ کی مائن کرافٹ کے 300 ملین کاپیوں کی فروخت کے بعد دوسرا بڑا ریکارڈ ہے۔

جی ٹی اے 6 کے ٹریلر میں ابھی بہت کم تفصیلات فراہم کی گئی ہیں، جو کہ اس سے پہلے بھی وقتاً فوقتاً سامنے آتی رہی ہیں۔ ٹریلر میں لوگوں کو کاروں میں ریسنگ اور کشتیوں میں پارٹی کرتے دکھایا گیا ہے۔ ایک منظر میں ایک شخص کو سوئمنگ پول سے مگر مچھ کو نکالتے ہوئے دیکھا جاسکتا ہے۔ ان مناظر سے ظاہر ہوتا ہے کہ جی ٹی اے 6 میں امریکی شہروں اور قصبوں کے ماحول اور پس منظر کو مد نظر رکھا گیا ہے۔

جی ٹی اے کو اس سے پہلے صرف مردوں کی گیم سمجھا جاتا تھا لیکن اس بار اس گیم میں ایک لڑکی کا کردار بھی متعارف کرایا گیا ہے۔ ٹریلر میں دیکھا جا سکتا ہے کہ ’لوسیا‘ جیل جمپ سوٹ میں ملبوس ہے اور اپنے دوست کے ایکشن اور ایڈوینچر کرنے کے لیے تیار ہے۔

ٹریلر میں فراہم کردہ تفصیل کے مطابق جی ٹی اے 6 صارفین کے لیے2025 میں ریلیز کی جائے گی۔ ایک پریس ریلیز میں راک سٹار نے بھی واضح کیا تھا کہ گیم اسٹیشن 5 اور ایکس باکس سیریز X/S پر بھی 2025 میں متعارف کرائی جائے گی۔

یہ بھی پڑھنا مت بھولیں

جواب دیں

آپ کا ای میل ایڈریس شائع نہیں کیا جائے گا۔ ضروری خانوں کو * سے نشان زد کیا گیا ہے

Back to top button