جہلم: ڈسٹرکٹ ہیڈکوارٹر ہسپتال جہلم کے میڈیکل سپیشلسٹ ڈاکٹر فواد مجید چوہدری نے کہا ہے کہ موسم میں خنکی آتے ہی کھانسی، نزلہ، زکام اور بخار کے مریضوں کی تعداد میں اضافہ ہو رہا ہے، جس کے باعث سرکاری و نجی ہسپتالوں میں مریضوں کا رش بڑھ رہا ہے۔ انہوں نے شہریوں کو بدلتے موسم کے اثرات سے محفوظ رہنے کے لیے خصوصی احتیاطی تدابیر اختیار کرنے کی ہدایت کی ہے۔
میڈیا سے گفتگو کرتے ہوئے ڈاکٹر فواد مجید چوہدری نے کہا کہ موسم کی تبدیلی کے دوران جسم کو درجہ حرارت میں اچانک تبدیلی سے محفوظ رکھنا ضروری ہے۔ موسم میں خنکی بڑھنے کے ساتھ شہریوں کو اپنی روزمرہ معمولات اور خوراک میں بھی احتیاط برتنی چاہیے تاکہ موسمی اثرات سے پیدا ہونے والی صحت کی شکایات سے بچا جا سکے۔
انہوں نے کہا کہ شہری ٹھنڈے مشروبات، برف والے پانی اور دیگر انتہائی ٹھنڈی اشیاء کے استعمال سے گریز کریں، کیونکہ موسم کی تبدیلی کے دوران ان کا استعمال صحت کے لیے نقصان دہ ثابت ہو سکتا ہے۔ خصوصاً گھروں میں پینے کے لیے بہت زیادہ ٹھنڈے پانی کے بجائے مناسب درجہ حرارت کا پانی استعمال کیا جائے۔
ڈاکٹر فواد مجید چوہدری نے شہریوں پر زور دیا کہ بدلتے موسم میں اپنی صحت کا خصوصی خیال رکھیں اور اچانک سردی سے بچنے کے لیے مناسب احتیاطی تدابیر اختیار کریں۔ انہوں نے کہا کہ موسم کی تبدیلی کے دوران احتیاط کو معمول کا حصہ بنا کر نزلہ، زکام، کھانسی اور بخار سمیت موسمی بیماریوں سے بچاؤ میں مدد حاصل کی جا سکتی ہے۔
