جہلم شہر سمیت ضلع بھر میں رمضان المبارک کی آمد کے سلسلہ میں ذخیرہ اندوزی عروج پر پہنچ گئی، منافع خوروں نے اشیائے خورونوش کی مصنوعی قلت پیدا کر کے قیمتوں میں اضافے کی تیاری کر لی ہے۔
شہریوں کا کہنا ہے کہ رمضان کی آمد سے پہلے ہی ذخیرہ اندوز منظم انداز میں متحرک ہو چکے ہیں اور ایک سوچی سمجھی سازش کے تحت ضروری اشیاء غائب کر کے رمضان میں دوگنا قیمتوں پر فروخت کرنے کا منصوبہ بنایا جا رہا ہے۔
عوامی شکایات کے مطابق سبزی ذخیرہ کرنے والے منافع خوروں نے آلو، ٹماٹر، پیاز، ادرک اور لہسن کی بڑی مقدار گوداموں میں رکھ لی ہے جبکہ پھل فروشوں نے کھجور، کیلا، سیب اور دیگر پھلوں کو ذخیرہ کر رکھا ہے۔ اس کے علاوہ کریانہ مرچنٹس نے چینی، دالیں، بیسن، چنے اور چاول جیسی بنیادی اشیاء کو بھی رمضان میں مہنگے داموں فروخت کرنے کے لیے جمع کر رکھا ہے۔
شہریوں نے قانون نافذ کرنے والے اداروں اور ضلعی انتظامیہ سے مطالبہ کیا ہے کہ وہ ذخیرہ اندوزوں کے خلاف سخت ایکشن لیں، فوری چھاپے مار کر ذخیرہ شدہ اشیاء برآمد کریں اور مصنوعی مہنگائی کے ناسور کو ختم کرنے کے لیے مؤثر حکمت عملی اپنائیں تاکہ روزہ داروں کو ریلیف فراہم کیا جا سکے۔
