دینہ میں صفائی ستھرائی کے معیار کو مزید مؤثر بنانے اور ویسٹ مینجمنٹ کے نظام کا جائزہ لینے کے لیے منیجنگ ڈائریکٹر سُتھرا پنجاب ایجنسی جہلم نے کنٹرول روم اور ڈمپ سائٹ کا دورہ کیا، جہاں صفائی آپریشن، ویسٹ کلیکشن، مانیٹرنگ سسٹم اور فیلڈ سرگرمیوں کا تفصیلی معائنہ کیا گیا۔
دورے کے دوران منیجنگ ڈائریکٹر نے کنٹرول روم کی کارکردگی، ڈمپ سائٹ پر صفائی کے انتظامات، کوڑا کرکٹ کی بروقت منتقلی، مشینری کی فعالیت اور عملے کی کارکردگی کا جائزہ لیا۔ انہوں نے متعلقہ افسران اور ٹھیکیدار سے صفائی کے مختلف مراحل پر بریفنگ بھی حاصل کی۔
اس موقع پر منیجنگ ڈائریکٹر نے متعلقہ ٹھیکیدار کو ہدایت کی کہ صفائی کے معیار کو مزید بہتر بنایا جائے، ڈمپ سائٹ پر شجرکاری میں اضافہ کیا جائے، سُتھرا پنجاب ایجنسی کی برانڈنگ کو مؤثر انداز میں نمایاں کیا جائے اور عوامی آگاہی کے لیے نمایاں مقام پر واضح سائن بورڈ نصب کیا جائے۔
انہوں نے کہا کہ شہریوں کو صاف ستھرا، صحت مند اور بہتر ماحول فراہم کرنا سُتھرا پنجاب ایجنسی کی اولین ذمہ داری ہے۔ اس مقصد کے حصول کے لیے صفائی آپریشن میں تسلسل، ویسٹ مینجمنٹ کے نظام میں بہتری اور جدید مانیٹرنگ کے ذریعے کارکردگی کو مزید مؤثر بنایا جائے۔
منیجنگ ڈائریکٹر نے ہدایت کی کہ تحصیل دینہ میں صفائی کے اعلیٰ معیار کو ہر صورت برقرار رکھا جائے اور تمام متعلقہ عملہ اپنی ذمہ داریاں پوری محنت، دیانتداری اور احساسِ ذمہ داری کے ساتھ انجام دے تاکہ شہریوں کو بہترین بلدیاتی سہولیات فراہم کی جا سکیں۔
