جہلم: ڈپٹی کمشنر سید محمد میثم عباس کی زیر صدارت 5 فروری کو یوم یکجہتی کشمیر کے انتظامات کے حوالے سے اجلاس منعقد ہوا۔ اجلاس میں اسسٹنٹ کمشنر، چیف آفیسرز میونسپل کمیٹیز اور دیگر متعلقہ افسران نے شرکت کی۔
ڈپٹی کمشنر نے کہا کہ 5 فروری کو ضلع جہلم میں یوم یکجہتی کشمیر بھرپور طریقے سے منایا جائے گا اور پاکستانی قوم اپنے کشمیری بھائیوں کے ناقابلِ تنسیخ حقِ خودارادیت کی حمایت کا اظہار کرے گی۔
انہوں نے محکمہ تعلیم، ہائر ایجوکیشن اور میونسپل کمیٹیز کے چیف آفیسرز کو ہدایت کی کہ وہ اس موقع پر تقریبات اور ریلیوں کا انعقاد یقینی بنائیں۔
علاوہ ازیں ڈپٹی کمشنر نے اجلاس میں عوامی بہبود کے متعدد جاری پروگرامز پر بھی روشنی ڈالی۔ انہوں نے بتایا کہ "اپنی چھت اپنا گھر” پروگرام کے تحت عوام کو گھروں کی تعمیر کے لیے مالی معاونت فراہم کی جا رہی ہے تاکہ بےگھر افراد کو رہائش کی سہولت میسر آ سکے۔
