جہلم: رمضان المبارک میں گراں فروشی کے مکمل خاتمے اور عوام کو ریلیف فراہم کرنے کے لیے ڈپٹی کمشنر جہلم میر رضا اوزگن کی زیرِ صدارت پرائس کنٹرول مجسٹریٹس کی کارکردگی کا جائزہ لینے کے لیے ایک اہم اجلاس منعقد ہوا۔
اجلاس میں مجسٹریٹس کی کارکردگی کا تقابلی جائزہ لیا گیا اور فیلڈ میں چیکنگ کے عمل کو مزید مؤثر بنانے کے لیے واضح ہدایات جاری کی گئیں۔
ڈپٹی کمشنر جہلم میر رضا اوزگن نے اجلاس کے دوران ہدایت کی کہ اب ہر پرائس کنٹرول مجسٹریٹ روزانہ کی بنیاد پر 40 کے بجائے کم از کم 50 انسپکشنز کو یقینی بنائے۔ انہوں نے واضح کیا کہ فیلڈ میں چیکنگ کا دائرہ کار وسیع کیے بغیر مصنوعی مہنگائی پر قابو پانا ممکن نہیں، اس لیے نگرانی کے عمل میں کسی قسم کی کوتاہی برداشت نہیں کی جائے گی۔
اجلاس میں ڈپٹی کمشنر جہلم نے پرائس مجسٹریٹس کو پابند کیا کہ وہ بازاروں میں سرکاری نرخناموں کی موجودگی اور اشیائے خوردونوش کے معیار کو خود موقع پر جا کر چیک کریں۔ انہوں نے کہا کہ عام آدمی کو ریلیف فراہم کرنا ضلعی انتظامیہ کی اولین ترجیح ہے، لہٰذا ذخیرہ اندوزوں اور ناجائز منافع خوروں کے خلاف سخت ترین قانونی کارروائی عمل میں لائی جائے۔
ڈپٹی کمشنر جہلم نے مزید ہدایت کی کہ رمضان المبارک کے دوران اشیائے خوردونوش کی قیمتوں پر کڑی اور مسلسل نظر رکھی جائے اور بڑھائی گئی انسپکشنز کی روزانہ کی بنیاد پر رپورٹ باقاعدگی سے پیش کی جائے، تاکہ قیمتوں کے استحکام اور عوامی ریلیف کو ہر صورت یقینی بنایا جا سکے۔
