سوہاوہ: ڈپٹی کمشنر جہلم میر رضا اوزگن نے اسسٹنٹ کمشنر سوہاوہ غزالہ اصغر کے ہمراہ سوہاوہ مین بازار کا تفصیلی دورہ کیا اور بیوٹی فیکیشن اسکیم کے تحت جاری مختلف ترقیاتی منصوبوں کا جائزہ لیا۔
اس موقع پر ڈپٹی کمشنر جہلم نے ہدایت کی کہ سوہاوہ مین بازار کی تزئین و آرائش اور ترقیاتی کاموں میں بین الاقوامی معیار کو مدنظر رکھا جائے تاکہ اسے ایک جدید ماڈل بازار کی شکل دی جا سکے جہاں شہریوں کو تمام بنیادی سہولیات میسر ہوں۔
دورے کے دوران ڈپٹی کمشنر نے بازار میں تجاوزات کے مستقل خاتمے، نکاسی آب کے نئے نظام اور سڑکوں کی ازسرنو تعمیر کے کاموں کا بھی معائنہ کیا۔
اسسٹنٹ کمشنر سوہاوہ غزالہ اصغر نے بریفنگ دیتے ہوئے بتایا کہ ماڈل بازار منصوبے کے تحت دکانوں کے سامنے یکساں رنگ و روغن، فٹ پاتھوں کی تعمیر اور جدید اسٹریٹ لائٹس کی تنصیب پر کام جاری ہے۔
ڈپٹی کمشنر جہلم میر رضا اوزگن نے ہدایت کی کہ ترقیاتی کاموں کی رفتار تیز کی جائے تاکہ شہری جلد از جلد ان سہولیات سے مستفید ہو سکیں اور سوہاوہ کی خوبصورتی میں مزید اضافہ ہو۔
انہوں نے کہا کہ سوہاوہ مین بازار کو ماڈل بازار بنانا ضلعی انتظامیہ کا اہم منصوبہ ہے جس کی تکمیل سے نہ صرف خریداروں بلکہ تاجروں کے لیے بھی بہتر کاروباری مواقع پیدا ہوں گے۔ ڈپٹی کمشنر نے اسسٹنٹ کمشنر سوہاوہ کو روزانہ کی بنیاد پر کام کے معیار کی جانچ کرنے اور منصوبے کو مقررہ وقت میں مکمل کرنے کی ہدایت بھی جاری کی۔
